«Бизда барча душманларимизни жаҳаннамга юбориш имконияти бор, лекин бу бизнинг вазифамиз эмас». Медведев янги пост эълон қилди

Россия Хавфсизлик кенгаши раиси ўринбосари, мамлакат собиқ президенти ва бош вазири Дмитрий Медведев ўз Telegram-каналида навбатдаги постини ёзди. Унда Россияга янги ҳудудлар керак эмаслигини, бироқ у ўзининг муқаддас ерларини ҳеч кимга бериб қўймаслигини қайд этган.

Шунингдек, Медведевнинг фикрича, Россияга қарши «ўлиб бораётган» дунё курашмоқда, у эса «ақлдан озган наркоман нацистлар, уларга учган ва улардан қўрққан халқ ҳамда Ғарб итхонасидан ҳуркович итлар галаси»дан иборат.

Бундан ташқари, собиқ бош вазир Россиядан воз кечган собиқ шериклар ва мамлакатни тарк этган фуқароларга нисбатан ҳақоратли иборалардан фойдаланган. «Биздан баъзи қўрқиб қолган шерикларимиз воз кечди — уларга тупурамиз. Демак улар бизга дўст бўлмаган, шунчаки тасодифий ҳамроҳлар бўлган… Қўрқоқ сотқинлар ва очкўз қочоқлар дунёнинг нариги чеккасига туёғини шиқиллатди — уларнинг суяклари бегона юртларда чирисин…», — дейилади постда.

«Бизда барча душманларимизни оловли жаҳаннамга юбориш имконияти бор, лекин бу бизнинг вазифамиз эмас», — дея ўз постини якунлаган Медведев.

Аввалроқ Россия таркибидаги Бошқирдистон республикаси пойтахти Уфа шаҳрида тўрт нафар талаба теракт ташкиллаштиришда айбланиб, ҳибсга олинганидан кейин, Россия Хавфсизлик кенгаши раиси ўринбосари, мамлакат собиқ президенти ва бош вазири Дмитрий Медведев бунга муносабат билдирган эди. У айбланувчиларни «чет эллик талабалар» ва «ярамаслар» деб атади, шунингдек, Иккинчи жаҳон уруши даврида «саботажчилар» (путур етказувчилар, тўсқинлик қилувчилар) отиб ташланганини эслатди.

«Замонавий Россияда ўлим жазосига мораторий (тақиқ) амал қилади. Бу ғоятда инсонпарварлик… Лекин, яна бир марта таъкидлайман, ҳозирги Конституция доирасида ҳам, Россия Конституциявий суди ҳуқуқий позициясини ўзгартиришда зарур бўлса, ўлим жазосига нисбатан мораторий енгиб ўтилиши мумкин. Бу одамларимиз, давлат ва жамият манфаатларини ҳимоя қилиш воситасини танлаш масаласидир», — дейилади Медведевнинг постида.

Медведев август бошида «ВКонтакте»даги саҳифасида пост қолдириб, Қозоғистонни русларга нисбатан геноцидда айблаган ва СССР қайта тикланишини маълум қилган эди. Кейинроқ унинг ёрдамчиси Олег Осипов Медведевнинг «ВКонтакте» ижтимоий тармоғидаги саҳифаси хакерлар ҳужумига учрагани ҳақида хабар берди.