Россия армияси фронтнинг алоҳида қисмларида жанговар ҳаракатлар шиддатини сезиларли даражада оширди. Бу ҳақда Украина қуролли кучлари бош қўмондони Валерий Залужний НАТО ва АҚШнинг Европадаги бирлашган кучлари командири Кристофер Каволи билан телефон суҳбати чоғида маълум қилди.
«Фронтдаги вазиятни муҳокама қилдик. У кескин, лекин назорат остида бўлиб қолмоқда, — деб ёзди Залужний ўз Telegram-каналида. — Душман фронтнинг алоҳида ҳудудларида жанговар ҳаракатлар шиддатини уч карра — ҳар куни 80 та ҳужумгача оширган. Жангчиларимиз мардлиги ва маҳорати шарофати билан биз мудофаани ушлаб турибмиз».
Украина қуролли кучларининг 4 ноябрь куни эълон қилинган эрталабки ҳисоботида айтилишича, Россия армияси ҳужум ҳаракатларини Бахмут, Авдеевка ва Новопавловка йўналишларига қаратган.
Ўтган бир кеча-кундузда Украина ҳарбийлари Донецк вилоятидаги бир қатор аҳоли пунктларида Россия ҳужумларини қайтаришга муваффақ бўлган. Россия армияси тўқнашув чизиғи бўйлаб Украина қуролли кучлари бўлинмаларини ўққа тутмоқда, авиаразведка олиб бормоқда, шунингдек, инфратузилма объектларига зарбалар беришда давом этмоқда, дейилади маълумотномада.
Украина қуролли кучлари маълумотларига кўра, Россия ҳарбийлари тўртта ракета ва 28 та авиазарбалар берган, шунингдек, баравар ўт очиш реактив тизимларидан 45 мартадан кўпроқ ўқ узган. Ушбу хатти-ҳаракатлар оқибатида Запорожье, Днепропетровск, Донецк, Херсон ва бошқа вилоятларда 30 дан ортиқ аҳоли пунктлари жабр кўрди.
Изоҳ (0)