Россия агрессияси оқибатида Мариуполга етказилган зарар 12,5—14,5 миллиард долларга баҳоланмоқда, деди шаҳар мэри Вадим Бойченко. Бу ҳақда Мариупол шаҳар кенгаши матбуот хизмати хабар берди.
«2600 та кўп қаватли уйнинг ярми вайрон бўлган. Ҳисоб-китобларимизга кўра, жами 33 минг инфратузилма объекти зарар кўрган. Россия бизнинг шаҳримизга товон тўлаши керак», — дея таъкидлади мэр Бойченко.
Унинг қайд этишича, «рус босқинчилари ўзларининг ҳарбий жиноятлари изини йўқ қилиш учун уйларни вайрон қилишда давом этмоқда».
«Аммо улар рўйхатга олиб қўйилган. Шундай экан, Россия ўз жиноятлари учун жавобгарликдан қутула олмайди», — деди Мариупол мэри.
Аввал Бирлашган Миллатлар Ташкилотининг маданият бўйича агентлиги ЮНЕСКО Россиянинг Украинага бостириб кириши оқибатида маданий обидаларнинг қанчасига зарар етганини маълум қилган эди. Унга кўра, уруш мобайнида Украинадаги 207 та маданий обида зарар кўрган.
Шу билан бирга, ҳозирча Украина ҳудудида жойлашган еттита жаҳон меросининг бирортасига зарар етмаган.
Изоҳ (0)