Германия канцлери Олаф Шольц ва Франция президенти Эммануэль Макрон АҚШ томонидан «ноҳалол рақобат»дан хавотирда ва зарур бўлган тақдирда «жавоб зарбаси беришга» тайёр. Бу ҳақда Politico нашри ўз манбаларига таяниб ёзмоқда.
Етакчилар 26 октябрь куни Парижда қарийб уч ярим соат суҳбатлашган. Яқинда бўлган келишмовчиликларга қарамай, иккаласи ҳам, агар Вашингтон инфляцияни пасайтириш ҳақидаги қонунини илгари сурадиган бўлса, Евроиттифоқ ҳаракатсизлик қила олмайди, деган хулосага келган. АҚШнинг ушбу қонунида АҚШ ҳудудида инвестиция киритувчи компаниялар учун солиқлар ва энергетик имтиёзлар ҳақида гап боради. Франция ва Германия бу қонун уларнинг автомобиль тармоғига таъсир қилишидан хавфсирамоқда.
Шольц ва Макрон агар АҚШ бундай сиёсатни давом эттирса, Евроиттифоқ ноҳалол рақобатга ёки инвестицияларни йўқотишга йўл қўймаслик учун, жавоб қайтаришига тўғри келади, деган фикрда. Бу, ўз навбатида, Трансатлантик муносабатларни янги савдо урушига ғарқ қилиши мумкин, деб ёзади нашр.
Ўтган ҳафта The Telegraph газетаси Шольц томонидан, Франция билан олдиндан маслаҳатлашмаган ҳолда, 200 миллиард евролик ички энергетик ёрдам схемаси ишга туширилиши Парижни ғазаблантиргани ҳақида ёзганди. Шу туфайли Франция ва Германия шу ҳафтага режалаштирилган ҳукумат маслаҳатлашувларини январгача кечиктирган.
Бундан ташқари, Франция томони Шольцнинг Хитойга ташриф буюриб, Си Цзиньпин билан учрашиш режасидан норози эди. Елисей саройидагилар канцлер у ерга Макрон билан бирга боришини кутганди.
Франция етакчиси аввалроқ АҚШни энергетика сиёсатида «қўш стандартлар» туфайли танқид қилган эди. Унинг сўзларига кўра, Вашингтон суюлтирилган табиий газни Европага юқори нархларда сотмоқда, аммо мамлакат ичида газ арзон.
Изоҳ (0)