Сеулнинг Украинага қурол-яроғ ва ўқ-дорилар етказиб бериш қарори Россия ва Корея Республикаси ўртасидаги муносабатларга путур етказиши мумкин. Бу ҳақда Россия президенти Владимир Путин айтиб ўтди, деб ёзади «Интерфакс».
«Бизнинг Корея Республикаси билан алоқаларимиз жуда дўстона. Ва биз доим Корея Республикаси билан ҳам, КХДР билан ҳам мулоқот олиб бориш имкониятига эга бўлганмиз. Аммо ҳозир бизга маълум бўлишича, Корея Республикаси Украинага қурол-яроғ ва ўқ-дори етказиб беришга қарор қилган. Бу муносабатларимизни бузади», — деди у «Валдай» халқаро муҳокама форуми ялпи сессиясида нутқ сўзлар экан.
«Биз Шимолий Корея билан ядро йўналишида ҳамкорликни қайта тикласак, Корея Республикаси бунга қандай қараган бўларди?» — деган саволни ўртага ташлади Россия президенти.
Бунга жавобан Жанубий Корея президенти Юн Сок Ёл мамлакат ҳеч қачон Украинага қирғин қуролини тақдим этмаганини айтди.
«Биз дунё ҳамжамияти билан бирдамлик белгиси сифатида Украинага гуманитар ва тинчлик ёрдамини берганмиз, бироқ ҳеч қачон қирғин қуроли ёки шунга ўхшаш бирон нарса тақдим этмаганмиз», — дея президент гапларидан иқтибос келтирди «Рёнхап» агентлиги.
Унинг қўшимча қилишича, Жанубий Корея «бутун дунё бўйлаб барча мамлакатлар билан, шу жумладан, Россия билан ҳам дўстона ва яхши муносабатларни сақлаб қолишга» интилади.
Изоҳ (0)