Шимолий Корея яна иккита баллистик ракета учирди

Шимолий Корея Япон денгизи томон номаълум турдаги баллистик ракеталарни учирди. Бу ҳақда Жанубий Корея ҳарбийларига таяниб, Yonhap агентлиги хабар берди.

КХДР ракеталари Жанубий Кореянинг ҳар йилги «Хогук» ўқув машғулотлари якунланган пайтда учирилган. Келаси ҳафта Сеул ва Вашингтон Вигилант Сторм кенг кўламли қўшма машғулотларини бошлайди.

Кейинроқ агентлик Жанубий Корея Штаб бошлиқларига таяниб, Пхеньян Япон денгизи томон иккита қисқа масофали баллистик ракета учирганига аниқлик киритди. Улар Канвондо провинциясидан учирилган.

КХДР охирги марта ракета синовларини 14 октябрда ўтказган эди. Ўшанда Пхеньян қисқа масофали баллистик ракета учирди. Жанубий Корея ҳарбийларига кўра, у тахминан 700 км масофани максимал 6 Мах тезликда босиб ўтган.

Ундан аввал КХДР Ким Чен Иннинг шахсан раҳбарлигида узоқ масофали стратегик қанотли ракеталарни учирган эди. Улар Сариқ денгиз устидан учиб ўтган ва «тахминан 2 минг км масофадаги нишонга тегган».

Умуман олганда, сентябрь охиридан бери Шимолий Корея ўнга яқин баллистик ракеталарни учирди.