Ўзбекистон банкларида муаммоли кредитлар икки ойлик кўпайишдан сўнг пасайди

Марказий банк 2022 йил 1 октябрь ҳолатига кўра банкларнинг муаммоли кредитлари тўғрисида маълумот берди.

Унга кўра, банклардаги жами кредит портфели 362,9 трлн сўмгача етган. Бу ўтган ойга нисбатан 7,4 трлн сўмга кўпроқдир. 

Сентябрь ойида банклардаги умумий муаммоли кредитлар (NPL) миқдори қарийб 300 млрд сўмга камайиб, 17,1 трлн сўмни ташкил қилган. 

Июль ойида бу кўрсаткич 250 млрд сўмга, август ойида эса 500 млрд сўмга ошган эди. Умумий кредит портфелидаги NPL улуши 0,2 фоизга тушиб, 4,7 фоиз бўлиб турибди. 

Банклар орасида NPL миқдори энг кўп «Халқ банк»ида сақланиб қолмоқда ва ўтган ойга нисбатан бироз пасайган — 3,4 трлн сўм. 

Муаммоли кредитларнинг улуши бўйича энг баланд кўрсаткич яқинда лицензияси қайтариб олинган «Туркистонбанк»да — банкнинг жами кредитлардаги NPL улуши 95 фоизни ташкил қилди. 

Аввалроқ Ўзбекистонда банк карталари сони 32 миллионтага яқинлашгани ҳақида хабар берилган эди.