Қашқадарё вилоятининг Ғузор туманида хизмат бурчини бажараётган 57 ёшли шифокорни калтаклаган шахс қамоққа олинди. Бу ҳақда вилоят ИИБ матбуот хизмати хабар берди.
Унда айтилишича, 14 октябрь куни Ғузор тумани тиббиёт бирлашмаси шошилинч тез тиббий ёрдам хизмати жонлантириш бўлимига юқори қон босими ташхиси билан Ғузор тумани Мустақиллик маҳалласида яшовчи Д.О. олиб келинган. Орадан ҳеч қанча фурсат ўтмасдан Д.О.нинг турмуш ўртоғи ва болалари шифохонада жанжал қилиб, беморнинг ўғли Р.А. жамиятда юриш-туриш қоидаларини бузиб, навбатчи-шифокор Т.Ҳ.ни ҳақорат қилиб, уриб, дўппослаб, тан жароҳати етказган.
Вилоят соғлиқни сақлаш бошқармаси берган хабарга кўра, шифокор калла ва бош мия шикастланиши, бош мия чайқалиши, бурун суягининг очиқ синиши, бурун асоси эзилиб, йиртилган жароҳати, юқори жағ ўнгдан қозиқ тишнинг травматик синиши, иккала қовоқ-бурун асоси гематомалари ташхиси билан травматология бўлимига ётқизилган.
Мазкур ҳолат юзасидан олиб борилган дастлабки тергов ҳаракатлари натижасида фуқаро Р.А.га нисбатан 20 октябрь куни Жиноят кодексининг 277-моддаси (безорилик) 3-қисми «г» банди билан айблов эълон қилиниб, у Жиноят процессуал кодексининг 221-моддаси тартибида ушланган ва Жиноят ишлари бўйича Ғузор туман судининг ажримига асосан айбланувчи Р.А.га нисбатан қамоққа олиш тарзидаги эҳтиёт чораси қўлланилган.
Айни пайтда тергов ҳаракатлари давом этмоқда.