Telegram каналларда Lacetti русумли, давлат рақами 01 978 LGА бўлган автомашина ўзи ва ўзгаларнинг ҳаётини хавф остига қўйиб, яъни йўл ҳаракатининг бошқа қатнашчиларини тезликни, ҳаракат йўналишини кескин ўзгартиришга мажбур қилувчи ҳуқуқбузарликни содир этиб ҳаракатлангани акс этган ведио тарқалганди. Тошкент шаҳри Йўл ҳаракати хавфсизлиги бошқармаси ҳолат юзасидан маълумот берди.
ЙҲХБ ходимлари ҳолат юзасидан суриштирув олиб борганда ҳуқуқбузарликни ҳайдовчи Б.К. томонидан содир этилгани аниқланиб, қоидабузар ҳайдовчига нисбатан Маъмурий жавобгарлик тўғрисидаги кодекснинг 128-прим 5-моддасининг 2-банди (базавий ҳисоблаш миқдорининг ўн баравари миқдорида жарима солишга сабаб бўлади) билан маъмурий баённома расмийлаштирилиб, ҳайдовчи билан профилактик суҳбат ўтказилди.
Видео эълон қилингач, ҳайдовчи Санитария-эпидемиология хизмати ходими экани ҳақида ҳам хабарлар тарқалди. Ҳолатга хизмат расмий муносабат билдирди.
Таъкидланишича, ушбу автомобиль раҳбар ўринбосарига бириктирилган бўлиб, ҳодиса содир бўлган вақтда ҳайдовчи оила аъзоларидан бирининг соғлиги ёмонлиги туфайли автомобилни тез бошқарган ва бу ҳаракати билан бошқа автомобиль ҳаракатига ҳалақит бергани учун ўша вақтнинг ўзида узр сўраган.
Айни вақтда ЙҲХБ томонидан ҳайдовчига нисбатан Маъмурий баённома расмийлаштирилиб, автомобиль жарима майдончасига олиб кетилган. Ўзбекистон Республикаси Санитария-эпидемиологик осойишталик ва жамоат саломатлиги хизмати раҳбарияти томонидан ушбу ҳолат бўйича ҳайдовчи билан тушунтириш-тарғибот ишлари олиб борилди, — дейилади муносабатда.
Изоҳ (0)