Тошкент вилоятида пиёдалар ўтиш йўлагини таъмирлаш учун ажратилган пуллар ўзлаштирилгани аниқланди

Тошкент, Қашқадарё ва Навоий вилоятларида қурилиш материалларини талон-торож қилингани аниқланди.

Бош прокуратура ҳузуридаги департаментнинг Янгийўл шаҳар бўлими томонидан ўтказилган терговга қадар текширувда, «К.Қ.» МЧЖ томонидан ерусти пиёдалар ўтиш йўлагини таъмирлашда 579,6 миллион сўмга сотиб олинган қурилиш материалларини таъмирлашга ишлатилмасдан, ўзлаштириш йўли билан талон-торож қилингани аниқланган.

Шу каби департаментнинг Чироқчи туман бўлими томонидан ўтказилган терговга қадар текширувда туман ободонлаштириш бошқармасининг собиқ раҳбари М.С., бош ҳисобчиси Б.Н. ва бошқалар «Ҳ.М.» МЧЖга етказиб берилмаган автоэҳтиёт қисмлари учун 100 миллион сўм, пиёдалар йўлакчасини чироқлар билан безатиш учун 40,4 миллион сўм, «Э.Т.» МЧЖ билан тузилган шартномага асосан ичимлик суви иншоотини қуришда бажарилмаган иш ҳажмларни қўшиб ёзиш орқали 195,1 миллион сўм, жами 335,1 миллион сўмни ўтказиб бергани аниқланган.

Департаментнинг Конимех туман бўлими томонидан ўтказилган терговга қадар текширувда эса, «Н.С.» МЧЖ раҳбари М.Ш. 1 сўм қийматда аукционга чиқарилган 14-сонли мактабнинг эски биносини ютиб олиб, инвестиция мажбуриятини бажармасдан, бинонинг 199,8 миллион сўмлик яроқли қурилиш материалларини ўз эҳтиёжлари учун ишлатиб юборгани аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 209-моддаси (мансаб сохтакорлиги) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.