«Дарё» кундалигида 20 октябрда содир бўлган энг муҳим воқеалар

«Дарё» нашри  20 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.

Россия Суриядаги ҳаво мудофааси ва ҳарбий кучларини Украинага олиб ўтди — The New York Times

Россия муҳим ҳарбий техника ва кучларини Суриядан Украинага ўтказди, деб хабар беради The New York Times Яқин Шарқдаги юқори лавозимли манбаларига таяниб.

Нашр суҳбатдошларига кўра, С-300 комплекслари ва мингдан ортиқ аскарлар Суриядан Украинага олиб келинган. Шунингдек, NYTнинг икки манбаси Суриядан Украинага иккита батальон (1200-1600 киши) жўнатилиши ҳақида айтган бўлса, яна бири аскарларнинг сони бундан кўпроқлигини иддао қилмоқда.

Газетанинг таъкидлашича, С-300 ва Россия қўшинларининг бир қисмини олиб чиқиб кетиш Исроилнинг ҳаракатларига таъсир қилиши мумкин. Манбаларнинг фикрича, унинг Украина армиясини қурол-яроғ билан таъминлашдан бош тортиши қисман руслар Суриядаги Исроил самолётларига қарши С-300 дан фойдалана олишидан чўчиш билан боғлиқ. Яна бир сабаб Россия Исроил фуқароларига мамлакатдан чиқиб кетишни тақиқлаб қўйишидан қўрқишдир.

Аввалроқ Исроил ҳукумати Украинага қурол бермаслиги, аммо ракета ҳужумидан огоҳлантириш тизимида ёрдам беришга тайёр эканлиги ҳақида хабар қилинган эди.

Зеленский Қрим кўпригидаги терактнинг буюртмачиси Киев эмаслигини таъкидлади

Украина етакчиси Владимир Зеленский ўз интервьюсида Киев Қрим кўпригидаги терактнинг буюртмачиси эмаслигини айтди. «Билишимча, биз буни буюрмаганимиз аниқ», — деди у Украинанинг воқеага алоқадорлигини рад этиб.

Аввалроқ Киев вилояти ҳарбий маъмурияти раҳбари Олексий Кулеба Украина бўйлаб ҳаво ҳужуми ҳақида огоҳлантириш эълон қилиб, аҳолини бошпаналарда қолишга чақирган. Айни вазиятда Винница, Чернигов ва Киев вилоятлари ракета ҳужуми остида қолган.

Британия бош вазири Лиз Трасс истеъфога чиқишини маълум қилди

Буюк Британиянинг 2022 йил 5 сентябрда сайланган бош вазири Лиз Трасс истеъфога чиқишини эълон қилди, деб ёзади «РБК». Трасс сўзларига кўра, у ўз кейинги вазир аниқланмагунча ўз вазифаларини бажаришда давом этади. Бу борадаги сайловлар келаси ҳафтада бўлиб ўтади

Қарор Британия иқтисодидаги инқироз ва унинг кабинетидаги бир қанча муҳим вазирларнинг кетиши фонида қабул қилинди. У 45 кун бош вазир лавозимида ишлади. Ўз навбатида, у Британия бош вазири сифатида 21-асрда энг кам фаолият юритган шахс сифатида ўзига хос антирекорд қайд этди.

«Мен улкан иқтисодий инқирозлар ва халқаро ғалаёнлар даврида лавозимга киришдим», — дея ўз нутқини тугаллади Лиз Трасс.

Евроиттифоқ 3 нафар эронлик генерал ва дрон ишлаб чиқарувчи Shahed компаниясига нисбатан санкциялар жорий қилди

Европа Иттифоқи Эроннинг Shahed дрон ишлаб чиқарувчи Shahed Aviation Industries компаниясига ҳамда Ислом Республикасининг уч генералига қарши санкциялар киритди, деб ёзади «Life.ru».

«Эрон режими Россиянинг Украинага қарши асоссиз ва ўринсиз тажовузига ҳарбий ёрдам кўрсатмоқда. Вазиятнинг оғирлигини ҳисобга олиб, Евроиттифоқ Кенгаши Россияга дронларни етказиб бериш билан боғлиқ уч шахс ва бир ташкилотни ҳам санкциялар рўйхатига киритишга қарор қилди», — дейилади хабарда.

Аввалроқ АҚШ Давлат департаменти Эронга қарши янги санкциялар жорий этилиши мумкинлиги билан таҳдид қилганди. Вашингтонда бунга сабаб сифатида Теҳроннинг Россияга «хавфли қурол» етказиб бераётганини кўрсатган.

«Ўзбекка ниҳоятда ачиняпман» — Ўзбекистон халқ шоири Усмон Азим жамиятда саводсизлик авж олгани ҳақида

Жамиятда китобхонлик йўқолиб бормоқда. Бу ҳақда Ўзбекистон халқ шоири Усмон Азим китоблар тақдимотида айтиб ўтди, дея хабар бермоқда «Дарё» мухбири.

Тирик истеъмол жамиятига айланиб бўлибсиз. Китобдан ташқари ҳамма нарсани сотиб олишади. Қорин тўйса, тўй қилса бўлди. Бошпанани ҳам, албатта, ўйлашса керак.

Ҳозир одамларга каллани ишлатадиган нарса керак бўлмай қолди. Яқинда институтга ўқишга кирмоқчи бўлган ёшлардан имтиҳон олдим. Менга юзма-юз келган абитуриентларнинг битта ҳам китоб ўқимаганлари бор эди. Энг ёмони, бундайлари жуда кўп. Китоб одамни ўстиради. Китобларда илм, дид, руҳ ва қалб жамланган.