Россия 10 октябрь куни Украинани оммавий ўққа тутиш учун камида 400 млн доллар сарфлаган — Forbes

Forbes журналининг украин версияси 10 октябрь куни Украина шаҳарларига қилинган йирик ракета ҳужуми Россия бюджетига қанчага тушганини ҳисоблаб чиқди. Нашрнинг ёзишича, ҳужум учун Россия 400—700 миллион доллар сарфлаган.

Нашрнинг расмий баёнотларга таяниб хабар беришича, Украина ҳудуди бўйлаб 84 та қанотли ракета учиб келган, ҳужумда 24 та дрон ҳам иштирок этган.

Учирилган ракеталарнинг нархи кенг диапазонда баҳоланади, чунки ҳар бир турдаги ракеталарнинг аниқ сони маълум эмас, деб таъкидлади Forbes. Хабарларга кўра, Украина ҳудудига Х-101, Х-555, «Калибр», «Искандер», «Торнадо-С» ва С-300 ракеталари учирилган.

Харажатларни ҳисоблаш учун Forbes қуйидаги нархлардан фойдаланган: Х-101 ракетаси нархи 13 миллион доллар, «Калибр» 6,5 миллион доллар, «Искандер» 3 миллион доллар, «Оникс» 1,25 миллион доллар, Х-22 1 миллион доллар ва «Точка-У» 300 минг доллар. 10 октябрда учирилган барча дронларнинг умумий қиймати эса бир неча миллион долларни ташкил этади.

Аввал Forbes ўз ҳисоб-китобларига таяниб урушнинг дастлабки икки ойида рус қўшинлари Украинага 1300 дан ортиқ ракета отгани, бу эса 7,5 миллиард долларга тушгани ҳақида хабар берганди.

10 октябрь куни Россия кучлари бир неча ой ичида биринчи марта Украинага, жумладан Киевга кенг кўламли ҳужум уюштирди. Ракета зарбалари Украина бўйлаб электр таъминотининг узилишига олиб келди. Россия расмийлари, хусусан Владимир Путиннинг ўзи снарядлар Қрим кўпригида 8 октябрь куни содир этилган портлашга жавоб эканлигини очиқ айтди. Бироқ Украина президенти офиси маслаҳатчиси Михаил Подоляк ракета зарбалари Қрим кўпригидаги портлашга алоқаси йўқлигини таъкидлади. «Россия армиясининг Украина шаҳарларига йўналтирилган бугунги ракета зарбалари бир неча ҳафта олдин режалаштирилган ва Қрим кўпригидаги портлаш билан боғлиқ эмас», — деди Подоляк.