Украина «ҳолдан тойган» Россия кучларига қарши урушда вазиятни ўзгартирмоқда. Россия армияси заиф ҳолатда, унинг аввалги ютуқлари эса мағлубиятларга айланмоқда. Бу ҳақда Буюк Британия Ҳукумат алоқа маркази (GCHQ) раҳбари Жереми Флемингнинг маърузасида айтилади. BBC ундан олинган парчаларни эълон қилди.
«Украинанинг жанг майдонидаги ва кибермакондаги дадил ҳаракатлари вазиятни ўзгартирмоқда», — деди Флеминг.
Унинг сўзларига кўра, ҳокимият ҳеч нарса билан чекланмагани туфайли, Россия президенти Владимир Путиннинг қарорлари хато бўлиб чиққан.
Шунингдек, Флеминг фикрича, 10 октябрь куни бутун Украина бўйлаб нишонларга ракета зарбаларига берилганига қарамай, Москвада ўқ-дорилар тугаб бормоқда, яқинда эълон қилинган сафарбарлик эса Россия президентининг чорасизлигини кўрсатади ҳамда уни танқид остида қолдириб, Россиянинг янада яккалаб қўйилишига сабаб бўлади.
Унинг айтишича, Россия халқи ҳозир «Путиннинг уруши» келтириб чиқарган муаммоларни тушунишни бошлаган. «Улар Путин вазиятни баҳолашда қанчалик адашганини кўряпти. Улар бошқа саёҳат қила олмасликларини тушунган ҳолда сафарбарликдан қочмоқда. Улар замонавий технологиялар ва ташқи алоқалар кескин чеклаб қўйилишини билади», — деди Флеминг.
Аввалроқ Ғарб экспертлари Украинадаги уруш йил охиригача Киев фойдасига якунланишини тахмин қилаётгани хабар берилганди. Улар йил охиригача уруш тугаб, Украина 24 февралгача бўлган чегараларига қайтишига умид қилмоқда.
Буюк Британия Мудофаа вазирлиги Украина ҳам шимоли-шарқий, ҳам жанубий фронтлардаги ҳужум операцияларида муваффақиятларга эришишда давом этаётганини маълум қилганди.
Украина ҳарбийлари Россия қўшинлари томонидан эгаллаб олинган Херсон вилоятида яна саккизта аҳоли пунктини озод қилгани ҳақида Украина президенти Владимир Зеленский ўтган ҳафта айтиб ўтганди.
Шу ҳафта Херсон вилоятидан ташқари, Харьков, Луганск ва Донецк вилоятларидаги шаҳар ва қишлоқлар ҳам «Россиянинг сохта референдумидан озод этилди», деди Зеленский. Унинг сўзларига кўра, гап озод қилинган ўнлаб аҳоли пунктлари ҳақида бормоқда.
Шунингдек, президент маълум қилишича, Украина армияси мамлакат жанубида «анча тез ва шиддатли тарзда» олға кетишда давом этмоқда.
4 октябрь куни Украина президенти офиси раҳбари ўринбосари Кирилл Тимошенко Донецк, Луганск, Николаев, Харьков ва Херсон вилоятларида 1534 та аҳоли пункти озод этилиб бўлганини маълум қилди. Ўз навбатида, Украина ички ишлар вазири ўринбосари Евгений Енин Херсон вилоятининг ўзида 50 та аҳоли пункти озод қилинганини айтди.
Шу куни Россия Мудофаа вазирлиги Украинадаги жанговар ҳаракатлар харитасини намойиш қилди, унга кўра, Херсон вилоятида фронт чизиғи тахминан 30 километрга жанубга силжиган.
Изоҳ (0)