Forbes jurnalining ukrain versiyasi 10-oktabr kuni Ukraina shaharlariga qilingan yirik raketa hujumi Rossiya budjetiga qanchaga tushganini hisoblab chiqdi. Nashrning yozishicha, hujum uchun Rossiya 400—700 million dollar sarflagan.
Nashrning rasmiy bayonotlarga tayanib xabar berishicha, Ukraina hududi bo‘ylab 84 ta qanotli raketa uchib kelgan, hujumda 24 ta dron ham ishtirok etgan.
Uchirilgan raketalarning narxi keng diapazonda baholanadi, chunki har bir turdagi raketalarning aniq soni ma’lum emas, deb ta’kidladi Forbes. Xabarlarga ko‘ra, Ukraina hududiga X-101, X-555, “Kalibr”, “Iskander”, “Tornado-S” va S-300 raketalari uchirilgan.
Xarajatlarni hisoblash uchun Forbes quyidagi narxlardan foydalangan: X-101 raketasi narxi 13 million dollar, “Kalibr” 6,5 million dollar, “Iskander” 3 million dollar, “Oniks” 1,25 million dollar, X-22 1 million dollar va “Tochka-U” 300 ming dollar. 10-oktabrda uchirilgan barcha dronlarning umumiy qiymati esa bir necha million dollarni tashkil etadi.
Avval Forbes o‘z hisob-kitoblariga tayanib urushning dastlabki ikki oyida rus qo‘shinlari Ukrainaga 1300 dan ortiq raketa otgani, bu esa 7,5 milliard dollarga tushgani haqida xabar bergandi.
10-oktabr kuni Rossiya kuchlari bir necha oy ichida birinchi marta Ukrainaga, jumladan Kiyevga keng ko‘lamli hujum uyushtirdi. Raketa zarbalari Ukraina bo‘ylab elektr ta’minotining uzilishiga olib keldi. Rossiya rasmiylari, xususan Vladimir Putinning o‘zi snaryadlar Qrim ko‘prigida 8-oktabr kuni sodir etilgan portlashga javob ekanligini ochiq aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.
Izoh (0)