Россиянинг Украина шаҳарларига кенг кўламли ракета ҳужуми вақтида Киевдаги энг йирик «Охматдет» болалар шифохонаси шифокори Оксана Леонтева ҳалок бўлди. Бу ҳақда унинг ҳамкасблари Facebook’да маълум қилди. Шаҳар марказига ракета келиб тушган вақтда шифокор ишга кетаётган бўлган.
Оксана Леонтеванинг ўлими ҳақида «Маёқли уй» хайрия маркази директори Лида Мониава ҳам хабар берди.
«Охматдет шифокори — Киевда болаларни саратон касаллигидан даволайдиган ва суяк илиги трансплантациясини амалга оширадиган Оксана Леонтева бугун ракета ҳужуми пайтида ҳалок бўлди. У ишга кетаётган эди», — деб ёзади Мониава.
10 октябрь куни Россия Украина бўйлаб аёвсиз ракета зарбаларини берди. Украина шаҳарларига 80 дан ортиқ ракета ташланган, уларнинг ярми ҳаво ҳужумидан мудофаа тизимлари томонидан уриб туширилган. Украина расмийларининг хабар беришича, Киевнинг ўққа тутилиши оқибатида камида саккиз нафар тинч аҳоли ҳалок бўлган.
Украина фавқулодда вазиятлар давлат хизмати берган сўнгги маълумотларга кўра, 11 октябрь куни эрталаб ҳолатига Россия ҳужумидан кейин Киев, Львов, Суми, Тернопол ва Хмелницкий вилоятларида 300 та аҳоли пункти электр таъминотисиз қилмоқда. 3500 дан ортиқ шаҳар ва қишлоқларда электр таъминоти аллақачон тикланган. 19 киши ҳалок бўлиб, яна 105 киши жароҳатлар олган.
Россия президенти Владимир Путин Украина шаҳарларининг ўққа тутилиши Керч бўғозидаги Қрим кўпригида содир бўлган портлашга жавоб бўлганини айтди. Бироқ Украина президенти офиси маслаҳатчиси Михаил Подоляк ракета зарбалари Қрим кўпригидаги портлашга алоқаси йўқлигини таъкидлади. «Россия армиясининг Украина шаҳарларига йўналтирилган бугунги ракета зарбалари бир неча ҳафта олдин режалаштирилган ва Қрим кўпригидаги портлаш билан боғлиқ эмас», — деди Подоляк.
Изоҳ (0)