Rossiyaning Ukraina shaharlariga keng ko‘lamli raketa hujumi vaqtida Kiyevdagi eng yirik “Oxmatdet” bolalar shifoxonasi shifokori Oksana Leontyeva halok bo‘ldi. Bu haqda uning hamkasblari Facebook’da ma’lum qildi. Shahar markaziga raketa kelib tushgan vaqtda shifokor ishga ketayotgan bo‘lgan.
Oksana Leontyevaning o‘limi haqida “Mayoqli uy” xayriya markazi direktori Lida Moniava ham xabar berdi.
“Oxmatdet shifokori — Kiyevda bolalarni saraton kasalligidan davolaydigan va suyak iligi transplantatsiyasini amalga oshiradigan Oksana Leontyeva bugun raketa hujumi paytida halok bo‘ldi. U ishga ketayotgan edi”, — deb yozadi Moniava.
10-oktabr kuni Rossiya Ukraina bo‘ylab ayovsiz raketa zarbalarini berdi. Ukraina shaharlariga 80 dan ortiq raketa tashlangan, ularning yarmi havo hujumidan mudofaa tizimlari tomonidan urib tushirilgan. Ukraina rasmiylarining xabar berishicha, Kiyevning o‘qqa tutilishi oqibatida kamida sakkiz nafar tinch aholi halok bo‘lgan.
Ukraina favqulodda vaziyatlar davlat xizmati bergan so‘nggi ma’lumotlarga ko‘ra, 11-oktabr kuni ertalab holatiga Rossiya hujumidan keyin Kiyev, Lvov, Sumi, Ternopol va Xmelnitskiy viloyatlarida 300 ta aholi punkti elektr ta’minotisiz qilmoqda. 3500 dan ortiq shahar va qishloqlarda elektr ta’minoti allaqachon tiklangan. 19 kishi halok bo‘lib, yana 105 kishi jarohatlar olgan.
Rossiya prezidenti Vladimir Putin Ukraina shaharlarining o‘qqa tutilishi Kerch bo‘g‘ozidagi Qrim ko‘prigida sodir bo‘lgan portlashga javob bo‘lganini aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.
Izoh (0)