Қозоғистоннинг Украинадаги элчихонаси Украина ҳудудида бўлиб турган қозоғистонликларга мурожаат қилиб, улардан иложи бўлса мамлакатни тарк этишни сўради.
Украина бўйлаб фуқаролик инфратузилмаси ва давлат объектларига ҳужумлар кучайгани муносабати билан Қозоғистон республикаси элчихонаси ўз фуқароларини Украинага боришдан тийилишга, мамлакатда бўлганларни эса ҳаво ҳужуми тревогасини эътиборсиз қолдирмасликка ҳамда бошпана ва бомбапаноҳларда қолишга чақиради. Шунингдек, элчихона Қозоғистон фуқароларидан иложи бўлса, Украина ҳудудини тарк этишни сўрайди, — дейилади мурожаатда.11 октябрь куни Ўзбекистоннинг Украинадаги элчихонаси ҳам Украина шаҳарларига ракета ҳужумларининг кучайиши ортидан Ўзбекистон фуқароларини ушбу мамлакатни тарк этишга чақирди. Элчихона, шунингдек, зиддият ўз изига тушгунига қадар Украинага саёҳат қилмасликни сўраган.
Эслатиб ўтамиз, 10 октябрь куни эрталаб Россия қўшинлари Украина шаҳарларини ракеталардан ўққа тута бошлади. Отишмада тинч аҳоли орасида қурбонлар бўлди, фуқаролик инфратузилмаси объектлари жиддий зарар кўрди, электр энергияси узилди.
Россия президенти Владимир Путин Украина шаҳарларининг ўққа тутилиши Керч бўғозидаги Қрим кўпригида содир бўлган портлашга жавоб бўлганини айтди. Бироқ Украина президенти офиси маслаҳатчиси Михаил Подоляк ракета зарбалари Қрим кўпригидаги портлашга алоқаси йўқлигини таъкидлади. «Россия армиясининг Украина шаҳарларига йўналтирилган бугунги ракета зарбалари бир неча ҳафта олдин режалаштирилган ва Қрим кўпригидаги портлаш билан боғлиқ эмас», — деди Подоляк.
Мавзуга доир: Польша Ташқи ишлар вазирлиги ўз фуқароларига Беларусни тарк этишни тавсия қилди
Изоҳ (0)