Фарғона вилоятининг Олтиариқ туманида пул эвазига ўқишга киритиб қўйишни ваъда қилган шахс ушланди. Бу ҳақда «Дарё»га вилоят ИИБ ахборот хизмати маълум қилди.
Қайд этилишича, 2022 йилнинг 8 сентябрь куни фуқаро Ю.И. вилоят Ички ишлар бошқармасига мурожаат қилиб, И.И. исмли шахс фарзандини Андижон давлат тиббиёт институтига ўқишга киритиб қўйишини айтиб, 2 минг доллар пулини олиб, ўз эҳтиёжларига сарфлаб юборганини билдириб, унга нисбатан қонуний чора кўришни сўраган.
Олиб борилган терговга қадар текширув ишлари давомида, И.И. ўқишга киритиб қўйишини айтиб, Д.Н. исмли аёлдан 2 минг 100 доллари, Х.Н. исмли аёлдан 600 доллар, Н.Ш. исмли аёлдан 1 минг 200 доллар миқдоридаги пулларни фирибгарлик йўли билан қўлга киритгани маълум бўлди.
Мазкур ҳолат юзасидан Олтиариқ тумани ИИБ ҳузуридаги тергов бўлими томонидан Жиноят кодексининг 168-моддаси 3-қисми «б» банди (фирибгарлик) билан жинояти иши қўзғатилган.
Изоҳ (0)