Ўзбекистонда бизнес соҳаси вакиллари келгуси бир йилда нархлар 13,8 фоизга ошишини кутмоқда

Марказий банк июнь ойи учун тадбиркорлик субъектларнинг инфляцион кутилмалари шарҳини тақдим қилди.

Жорий йилнинг сентябрь ойи якунларига кўра, келгуси 12 ой учун нархлар ўсиши бўйича бизнес вакилларининг инфляцион кутилмалари ўтган ойга нисбатан 0,3 фоиз бандга камайиб, 13,8 фоизгача пасайди.

Келгуси 12 ойда инфляция кўрсаткичи жорий даражада ёки ундан юқорироқ бўлишини кутаётган бизнес вакилларининг улуши ўтган ойга нисбатан 2 фоизга пасайиб, 45 фоизни ташкил этди.

Ушбу ойда тадбиркорларнинг аксарият қисми келгуси 12 ойда инфляцияни 9-12 фоиз атрофида бўлишини кутишмоқда. 

Шунингдек, сентябрь ойида бир йилдан сўнг инфляция 6-8 фоиз доирасида бўлишини кутаётган бизнес вакилларининг улуши ортиб бормоқда.

Бизнес вакиллари томонидан кейинги 12 ойда нархлар ошишига ёнилғи маҳсулотлари ва транспорт хизматларининг нархлари қимматлашиши (35 фоиз) ҳамда иш ҳақи ва нафақаларнинг ошиши (23 фоиз) каби омиллар таъсир этиши мумкинлиги таъкидланди.

Шунингдек, келгусида нархлар ошишига хориждан хом ашё етказиб беришда узилишлар юзага келиши ҳамда импорт қилишдаги тариф ва нотариф чекловларнинг сақланиб қолинишини кутаётган тадбиркорларнинг улуши пасайишда давом этмоқда.