Россия ҳудудларида сафарбарлик муносабати билан Янги йил тадбирлари ва бошқа байрамлар бекор қилина бошланди
Россиянинг бир қатор ҳудудларида мамлакатдаги сафарбарлик муносабати билан ҳар қандай байрам тадбирлари, жумладан Янги йил тантаналарини ҳам бекор қилинди, дея хабар беради Meduza.
Санкт-Петербург, Ленинград вилояти ва Нижний Новгородда бошланган сафарбарлик туфайли янги йил байрамларини ўтказишдан бош тортдилар. Шу билан бирга, учала вилоятда ҳам болаларнинг янги йил тадбирлари бекор қилинмаслиги таъкидланди.
Санкт-Петербургда Сарой майдони ва Невский проспектидаги концерт, феерверклар ва Таурид саройидаги зиёфат бекор қилинди. Ленинград вилоятида барча минтақавий оммавий кўнгилочар тадбирлар, шу жумладан Янги йил корпоратив кечалари ҳам бекор қилинди. Нижний Новгородда оммавий тадбирлар, мушакбозлик ва концертлар ҳам тўхтатилди.
«Биз тежалган маблағни кўнгиллилар ва сафарбар қилинганлар учун қўшимча жиҳоз ва аслаҳалар сотиб олишга сарфлаймиз», — деб ёзди Санкт-Петербург губернатори Александр Беглов ўзининг Telegram каналида.
