Путин ва ҳарбийлар ўртасидаги ёпиқ учрашувдан сўнг, Россия давлат матбуотига урушдаги муваффақиятсизликлар ҳақида ёзишга рухсат берилди

Россия давлат матбуоти Украинага бостириб киришнинг айрим муваффақиятсизликларини тан ола бошлади. Бу Владимир Путиннинг уруш мухбирлари билан шахсий учрашувидан бир неча ҳафта ўтиб содир бўлди, деб ёзади «Агенство Новости»

Учрашув «қисман» сафарбарлик эълон қилинишидан бироз олдин бўлиб ўтган, деб хабар берди Bloomberg суҳбатдошлари. Унда ҳарбий қўмондонликдан норози бўлган уруш мухбирлари Путинга фронтда содир бўлаётган воқеаларнинг даҳшатли манзарасини тасвирлаб берди. Учрашувни тарк этаркан, айрим мухбирлар Путин ҳақиқатан ҳам Украинадаги ҳақиқий вазият ҳақида тўлиқ тасаввурга эга бўляптими, деб ҳайрон бўлган, дейди агентлик манбалари.

Жами ёз бошидан бери ҳарбий мухбирлар билан камида иккита учрашув бўлиб ўтди, деб ёзади Bloomberg. Президент матбуот котиби Дмитрий Песков мақолага изоҳ бериш ҳақидаги сўровга жавоб бермади.

Маълумки, Россия президенти июнь ойида Санкт-Петербург халқаро иқтисодий форуми доирасида ҳарбий журналистлар билан суҳбатлашган эди. Сентябрь ойи бошида Песков йил охиригача давлат раҳбари «махсус операция» жараёнини ёритувчи журналистлар билан навбатдаги учрашув ўтказиши мумкинлигини айтганди.

Bloomberg манбаларининг айтишича, сўнгги ҳафталарда Кремль баъзи давлат оммавий ахборот воситаларига ҳарбий муваффақиятсизликларни тан олишни бошлашни буюрган, чунки ҳукумат ҳаддан ташқари ижобий теледастур одамларда унинг етарлилигига шубҳа уйғотишидан қўрқади. Шундан сўнг ҳукуматпараст нашрларда ҳарбийларга нисбатан оммавий танқидлар пайдо бўлди.

Ҳарбий қўмондонликни жамоатчилик танқиди Украина шаҳарлари ва инфратузилмасига ҳужумларни оқлаш учун ишлатилиши мумкин, деб ҳисоблайди сиёсатшунос Татяна Становая. «Ҳукмрон элита ўртасида бу урушда қандай ғалаба қозониш ҳақида баҳс мавжуд. Айбдорларни қидириш ишлари олиб борилмоқда ва улар Путинни бошқа ечим излашга мажбурламоқда», — деди Становая.

Ҳатто 1 октябрь шанба куни Лиман таслим бўлганидан кейин ҳам Чеченистон раҳбари Марказий ҳарбий округ генерали Александр Лапинни кескин танқид қилиб, уни «ўртамиёна» деб атади. Шу ҳафта Давлат Думаси Мудофаа қўмитаси раҳбари Андрей Картаполов Мудофаа вазирлигини ёлғон гапиришни бас қилишга чақирди. Кейинчалик Давлат Думасининг иккита қўмитаси раҳбарлари дарҳол Бош прокуратурага Россия армиясини таъминлаш билан боғлиқ вазиятни ўрганиш илтимоси билан мурожаат қилди.

Мамлакатнинг асосий пропагандачилари эфирда ҳарбий омадсизликлар ҳақида гапиришни бошлаган. Олга Скабеева ўзининг «60 дақиқа» дастурида Россия Херсон вилоятидаги ўндан ортиқ аҳоли пунктларини йўқотгани ҳақида хабар берди, Владимир Соловёв эса ўзининг «Владимир Соловёв билан оқшом» кўрсатувида Россия жанг майдонида унчалик яхши ишламаяпти, деб тан олди. Ундан ташқари, RT раҳбари Маргарита Симонян Владимир Путин ҳатто фронтдаги вазиятдан хабардорлигини шубҳа остига олди.