Украина АҚШдан узоқ масофага учувчи қуроллар, жумладан, ATACMS (Army Tactical Missile System) ракеталарини сўрамоқда. Киевга бундай қуроллар Россия ҳудудига, хусусан, Қримга зарба бериш учун керак. Вашингтон эса бундай ракеталарни беришдан бош тортмоқда, деб хабар берди The Wall Street Journal нашри америкалик расмийлар ва Конгресс вакилларига таяниб.
«Биз уларга бундай қуролларни бермаётганимиз сабаби Қримдаги нишонларга зарба беришни маъқулламаслигимиз», — деди нашрга АҚШ Конгрессининг исмини ошкор этмаган расмийси.
Украина расмийлари америкаликларни бу ракеталар гўёки Қримда жойлашган дронлар базасига зарба бериш учун зарурлигига ишонтирган.
Айни пайтда, нашрнинг ёзишича, АҚШ расмийлари можаронинг ҳозирги босқичида Киев узоқ масофали ракеталарга муҳтож эмас, деб ҳисоблайди. Агар улар Украинага берилса, Москва бундай ҳаракатни кескинлашув сифатида баҳолаши мумкин.
Бундан ташқари, нашр суҳбатдошларининг айтишича, АҚШ маъмурияти ўз захиралари тугашидан қўрқиб, Украинани ATACMS ракеталари билан таъминламоқчи эмас. Оқ уй расмийлари Сенат ва Вакиллар палатаси аъзоларига Украинага ракеталарнинг етказилиши Қўшма Штатлар «ҳарбий кучларининг жанговар тайёргарлигига» путур етказиши мумкинлигини айтган.
Изоҳ (0)