Kremldagilar birinchi marta Putinni va Ukrainadagi urushni tanqid qiluvchi san’atkorlarga munosabat bildirdi.
Ba’zi rossiyalik artistlar “nomaqbul bayonotlari bilan o‘z nomiga dog‘ tushirdi”, dedi Rossiya prezidenti matbuot kotibi Dmitriy Peskov jurnalistlarga.
“Shunday san’atkorlar borki, ular mutlaqo nomunosib va nomaqbul bayonotlari bilan tom ma’noda o‘zlariga dog‘ tushirdi. Bu alohida hikoya, va ular bilan yo‘llarimiz boshqa-boshqa ekanligi aniq-ravshan”, — dedi Kreml vakili.
Peskov urush boshlanganidan keyin ketgan artistlarning mamlakatga qaytishini izohlayotib shunday fikrlarni aytib o‘tdi. Ular orasida Alla Pugachyova ham bo‘lib, u bahorda turmush o‘rtog‘i Maksim Galkin va farzandlari bilan mamlakatni tark etgandi. Avgust oxirida u Rossiyaga qaytib keldi.
Peskov qayd etishicha, Pugachyovadan hech qanday nomaqbul bayonotlarni eshitmagan, ammo Galkin, matbuot kotibining fikricha, “juda yomon gaplarni gapirgan”. “U bilan yo‘llarimiz boshqa-boshqa, bu aniq”, — deya qo‘shib qo‘ydi Peskov. Vladimir Putinning vakili ta’kidlashicha, Galkinning gaplariga hozircha “vakolatli organlar” baho bergani yo‘q, biroq “uning gaplari uning o‘zini bizga qarshi qilib qo‘yadi”.
Ayni vaqtda Pugachyovaga prezident “juda yaxshi” munosabatda. “Ular bir-birini biladi, ular tanish, bir necha marta uchrashishgan”, — dedi Peskov.
Peskovning bayonoti Pugachyovaning urushga qarshi postidan keyin bir necha soat o‘tib yangradi va u ushbu postga javob deb hisoblanishi mumkin.
Rossiya Ukrainaga bostirib kirgach, bir qator san’atkorlar urushga qarshi chiqdi, ularning ayrimlari Rossiyani tark etdi. Urush va Putinni tanqid qilgan artistlar deyarli darhol konsertlari bekor qilinishi holatiga duch keldi. Ularning bir qatori esa “xorijiy agentlar” ro‘yxatiga kiritildi.
Konsertlari nooshkorona taqiqlangan bo‘lishiga qaramasdan, Kreml shu paytgacha hukumatni tanqid qiluvchi qo‘shiqchilarga nisbatan o‘z munosabatini bildirmagandi. Mart oxirida Peskov ba’zi artistlarning mamlakatdan ketishini oshiqcha bo‘rttirmaslikka chaqirgan edi, xolos. Shuningdek, Kreml harbiylar uchun, shu jumladan, kasalxonalarda konsert berayotgan san’atkorlarni qo‘llab-quvvatlagan edi.
Izoh (0)