Аляскада сафарбарликдан қочиб қайиқда сузиб келган россияликлар қўлга олинди

АҚШнинг Аляска штатига кирувчи Авлиё Лаврентий оролида икки россиялик қўлга олинди, улар, ўзларининг айтишича, Чукоткадан қайиқда сузиб келган.

Аласкаъс News Соурcе нашри хабарига кўра, россияликлар оролга 4 октябрь куни тушган. Улар маҳаллий аҳолига Чукоткадаги Эгвекинот қишлоғидан қайиқда келганини айтган. У ердан Авлиё Лаврентий оролигача бўлган масофа денгиз бўйлаб 500 километрни ташкил этади. Маҳаллий аҳоли сўзларига кўра, россияликлар уларга армияда хизмат қилишдан қочганини айтган.

Авлиё Лаврентий оролига сузиб келганлар қўлга олинди. Улар дастлаб оролдаги Гембелл шаҳрида бўлган, сўнг Аляскадаги энг йирик шаҳар — Анкорижга юборилган. У ерда улар билан федерал ҳукумат вакиллари шуғулланмоқда. Россияликлар АҚШ чегарасини босиб ўтиш қоидаларини бузган-бузмаганлиги ҳамда уларнинг мамлакатда бўлишга қанчалик ҳақли экани аниқланиши керак.

Аляска губернатори Майк Данливи мавжуд маълумотларга асосланиб баёнот беришича, бу шу пайтгача юз берган ягона ҳолатдир. Унинг сўзларига кўра, штат маъмурияти Россиядан доимий муҳожирлар оқимини кутмаяпти.

Эслатиб ўтамиз, 21 сентябрь куни Россияда қисман сафарбарлик эълон қилинганидан кейин, мамлакатни тарк этувчи одамлар сони кескин ўсди. Қуруқликдаги чегараларда катта-катта навбатлар юзага келди, энг яқин визасиз мамлакатларга авиарейслар учун чипталар сотилиб кетди.

Аввалроқ Оқ уй сафарбарликдан қочаётган Россия фуқаролари АҚШда бошпана учун ариза бериши мумкинлигини эълон қилганди.