Россия президенти Владимир Путин Федерал хавфсизлик хизмати қаршилигига қарамасдан, «азовчилар»ни айирбошлашга рози бўлган, чунки, ўзининг «чўқинтирган отаси» Медведчукни Украинадан қайтариб олишни жуда хоҳлаган, деб хабар бермоқда The Washington Post.
Нашр Украина разведкасидан олинган маълумотларга таяниб ёзишича, асирлар билан айирбошлашув ҳақидаги битим икки ой давом этган музокаралар чоғида бир неча марта кейинга қолдирилган. Бироқ Путин айирбошлашни талаб қилиб туриб олган.
«Путин ўзининг қадрдон дўсти ва Украинадаги узоқ муддатли воситачиларидан бири Медведчукни Мариупол қаҳрамонларига алмаштиришга қарор қилгани ибратлидир. Украинада ушбу қаҳрамон жангчиларнинг уйга қайтганига жуда хурсанд бўлишган бўлса, Москвада қаттиқ норози бўлишди», — дея нашр АҚШ Давлат департаментининг юқори мансабли ходими гапларини келтириб ўтди.
Эслатиб ўтамиз, 21 сентябрь куни ссирлар билан айирбошлашув доирасида Киев Москвага сиёсатчи Виктор Медведчукни ва 55 нафар россиялик ҳарбийларни топширганди.
Медведчук 215 нафар украин ҳарбийлари, шу жумладан, Мариуполдаги «Азовсталь» заводи ҳимоячилари ва «Азов» полки қўмондонлигига алмаштирилган. Шунингдек, Украина томонида жанг қилиб, асирликка тушган ўн нафар чет эллик ҳам қайтарилган.
Шундан кейин Чеченистон етакчиси Рамзан Қодиров Россия ва Украина ўртасида бўлиб ўтган асирлар алмашинувидан норози эканини маълум қилди.
«Мухолифат платформаси – ҳаёт учун» партияси раҳбари Виктор Медведчук россияпараст сиёсатчи сифатида танилган. ОАВ уни «Владимир Путиннинг қадрдони» деб атайди.
2021 йилда Украина ҳуқуқ-тартибот идоралари Медведчукка давлатга хиёнат ва «миллий бойликларни талон-тарож қилишга уриниш» бўйича иккита айблов қўйди. Медведчук уй қамоғига олинган, хабарларга кўра, у Россия Украинага бостириб кирган дастлабки кунларда қочиб кетган. 12 апрель куни Украина расмийлари Медведчук ҳибсга олингани ҳақида маълум қилди.
Медведчук алмашинув доирасида Россия томонига ўтказилиши мумкинлиги ҳақида таклифлар бор эди, аммо шу пайтгача бу амалга ошмаганди.
Изоҳ (0)