Польша Беларусь билан чегарада тўсиқ қуришни якунлади, бу ҳақда Польша махсус хизматлари вакили Станислав Жарин маълум қилди.
«Айни пайтда Польшага ноқонуний кириш имкони йўқ. Бугунги кунда Польша чегараси — Европада энг кучли ҳимояланган чегара», — деб ёзди у Twitter’да ва девор суратларини илова қилди.
Польша чегарада девор қуришни 2021 йил бошида Беларусь орқали Евроиттифоққа ноқонуний ўтишга уринаётган муҳожирлар оқими кўпайиши туфайли бошлаганди. Евроиттифоқ миграция инқирози юзага келишида Беларусь ҳукуматини айблади ва мамлакат ҳуқуқ-тартибот органлари ноқонуний муҳожирларни тўхтатишга ҳаракат қилмаслик билан бирга, уларни атайлаб чегарага яқин ҳудудга олиб келаётганини даъво қилди.
2021 йил сентябрида Польша ҳукумати 418 километрлик тўсиқ қурилишини маъқуллаганди.
Чегарада девор қуриш тахминан 1,6 миллиард злотий (330 миллион евро)га тушди.
Аввалроқ Польша ҳукумати девор қуриш учун 49 минг тонна пўлатдан фойдаланилганини маълум қилганди. Шунингдек, тўсиқни 2,5 мингта кузатув камераси билан жиҳозлаш режалаштирилаётганди.
Август охирида Литва ҳам Беларусь билан чегарадаги девор қурилишини якунлаган эди.
Изоҳ (0)