Буюк Британия бош вазири Лиз Трасс ва қирол Чарльз III ўртасида БМТнинг иқлим ўзгариши бўйича COP27 конференциясида қатнашиш борасида зиддиятлар юзага келди. Бу ҳақда The Sunday Times хабар бермоқда.
Таъкидланишича, бош вазирнинг қатъий талаби билан Британия қироли тадбирда иштирок этишдан бош тортган. «Чарльз III Мисрда дунё етакчилари учрашувида нутқ билан чиқиш қилишни режалаштирганди. Трасс ўтган ой Букингем саройидаги шахсий қабул чоғида қиролнинг режаларига қарши чиқди, унинг ўзи ҳам Шарм-аш-Шайхдаги саммитга бориши амри маҳол», — дейилади хабарда.
Times маълумотларига кўра, бу қарор бош вазир ва қирол ўртасидаги муносабатларда кескинликни кучайтириши мумкин. Нашр манбаси қайд этишича, бу масала бўйича муҳокама «самимий кайфиятда», можароларсиз кечган. «Жаноби олийлари саммитда жисмонан қатнашмаса-да, у иштирок этиш усулларини топади», — деди у.
Times’нинг яна бир манбаси таъкидлашича, қирол Чарльз иқлим бўйича конференцияда қатнашмаса, ҳафсаласи пир бўлади.
COP27 2022 йил ноябрида бўлиб ўтади. Глобал фалокат олдини олиш бўйича режалар муҳокама қилинадиган янги нуқталар Миср ва Бирлашган Араб Амирликлари бўлади.
Чарльз III аввалдан экология ва иқлим муаммолари билан шуғулланиб келган. 1970 йил февралида Европа табиий меросини асраш бўйича конференцияда қатнашиб, атроф-муҳит ифлосланиши оқибатлари ҳақида нутқ сўзлаган эди. 2015 йилда у иқлим бўйcиҳа Париж битимини фаол қўллаб-қувватлаган, 2019 йилда эса ушбу мавзуни АҚШ президенти Дональд Трамп билан муҳокама қилганди.
2021 йилда у БМТнинг иқлим ўзгариши ҳақидаги конвенциясининг Глазгода бўлиб ўтган 26-сессиясида иштирок этган.
Изоҳ (0)