АҚШнинг Шарқий соҳилларига ёпирилган «Иэн» довули Флорида ва Шимолий Каролина штатларида 77 кишининг умрига зомин бўлди, ўн мингдан ортиқ одам бедарак йўқолган деб ҳисобланилмоқда. Бу ҳақда Sky News хабар берди.
Ҳалок бўлганларнинг 73 нафари Флоридада бўлиб, улар асосан сувга ғарқ бўлиш оқибатида нобуд бўлган. Шунингдек, довулнинг бавосита таъсири ҳам бўлган: кекса эр-хотин электр энергияси узилиб қолиши натижасида кислород қурилмалари ишлашдан тўхтаб қолганидан кейин вафот этган.
Яна тўртта ўлим Шимолий Каролинада қайд этилган, шу жумладан, икки киши ЙТҲ оқибатида ҳалок бўлган.
Ўн мингдан ортиқ одам бедарак йўқолган деб ҳисобланилмоқда. Ҳукумат фикрича, уларнинг кўпчилиги пана жойларга яширинган ёки электр таъминоти билан боғлиқ муаммолар туфайли алоқага чиқа олмаяпти.
«Иэн» кучсизлашган ва энди циклонга айланган, лекин у ҳали ҳам хавфли, дея огоҳлантирмоқда расмийлар. Шу дам олиш кунлари мураккаб об-ҳаво шароитлари Атлантика соҳилларининг кенг ҳудудларида, жумладан, Нью-Йорк ва Нью-Жерси штатларида, пойтахт Вашингтонда юзага келиши кутилмоқда.
Аввалроқ 42 нафар қурбон ҳақида хабар берилган эди. «Иэн» довули Флоридага 28 сентябрь куни ёпирилди.Шамолнинг тезлиги соатига 250 км га етган. Штатда кўплаб вайронагарчиликлар қайд этилди, 2,5 миллионга яқин одам электр энергиясидан маҳрум бўлди, телекоммуникация тармоқлари узилди, аэропортлар ёпилди.
Изоҳ (0)