Россия космик технологиялар ёрдамида Ғарб мамлакатларига қарши ҳарбий ҳаракатлар олиб бориши мумкин, дея маълум қилди Буюк Британия мудофаа штаби бошлиғи Энтони Радакин The Telegraph нашрига берган интервьюсида.
«Улар коинотда имкониятларга эга. Биз бунга мисолни ўтган йил охирида, Россия фазовий объектни портлатиб, натижада улкан бўлаклар юзага келганида кўргандик», — деди у.
Радакин қўшимча қилишича, Россияда нафақат коинотда, балки сув остида ҳам ўта муҳим миллий инфратузилмага «ҳужум қилиш» имконияти мавжуд. Масалан, жаҳон ахборотининг 95 фоиздан ортиғи узатиладиган кабеллар ишини издан чиқара олади. Бироқ ҳарбий бошлиқ қайд этишича, бу НАТОнинг кучли реакциясига сабаб бўлади, Россия эса альянс билан урушга киришишни истамайди.
Шу йилнинг июнь ойида Россиянинг Украинадаги жанговар ҳаракатлари фонида «Роскосмос» раҳбари Дмитрий Рогозин бутун космик қурилмалар ресурси Мудофаа вазирлиги манфаатларига жалб этилганини маълум қилганди. Орбитада 160 дан ортиқ ҳарбий ва фуқаролик сунъий йўлдошлари бор, деган эди у.
Шу билан бирга, Рогозин биргина америкалик бизнесмен Илон Маскнинг орбитада 2 мингдан ортиқ Starlink тизими қурилмалари борлигига эътибор қаратганди. Унинг сўзларига кўра, бошқа мамлакатлар сунъий йўлдошлари билан бирга улар Россия ҳарбийлари устидан назорат олиб боради ва маълумотни ўт очиш позицияларига узатади.
Изоҳ (0)