Ўзбекистонликларга Умра сафарини расмийлаштириш ва Саудия Арабистонига борди-келди ишлари янада қулайлаштирилади. Бу ҳақда 29 сентябрь куни Саудия Арабистони ҳаж ва умра ишлари вазири Тавфиқ бин Фавзон ар-Рабиа Тошкент шаҳрида журналистлар билан мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Мулоқотда вазир Тавфиқ бин Фавзон ар-Рабиа сўзи аввалида делегацияни Ўзбекистонда яхши кутиб олишгани ва чиройли меҳмондўстликни кўрганини айтиб ўтди.
«Мақсадимиз ҳожи ва Умра зиёратчиларига барча ишларни енгиллаштириш. Бунда асосий ишлар Умра сафарини расмийлаштириш, борди-келди йўлларини қулайлаштириш ва уларнинголдида турган тўсиқларни бартараф қилишдан иборат», – деди Тавфиқ бин Фавзон ар-Рабиа.
Вазирнинг қўшимча қилишича, ташрифда ўзбекистонлик зиёратчиларни нафақат Макка ва Мадина шаҳарларига балки Саудия Арабистонининг бошқа шаҳарларига ҳам саёҳатларни ташкил этиш кўзда тутилган.
Ташрифнинг биринчи кунида вазир Тавфиқ бин Фавзон ар-Рабиа бошчилигидаги делегацияси Дин ишлари қўмитаси ҳамда Мусулмонлар идораси раҳбарлари билан учрашувда ҳаж ва умра хизмати сифатини ошириш, зиёрат нархини арзонлаштириш муҳокама этилган эди.
Президент Шавкат Мирзиёев вазир Тавфиқ бин Фавзон ар-Рабиа бошчилигидаги делегацияни қабул қилиш маросимида Ўзбекистон фуқаролари учун йиллик ҳаж квотасини икки баробар — 24 минг нафаргача, умра квотасини эса 100 минг нафаргача ошириш юзасидан келишувга эришилган.
Изоҳ (0)