Самарқандда фермер хўжалиги раҳбари экин ер майдонида ўзбошимчалик билан уй-жой қургани аниқланди

Самарқанд ва Сурхондарёда суғориладиган экин ер майдонларини ўзбошимчалик билан эгаллаб олган шахслар аниқланди. Бу ҳақда Бош прокуратура ҳузуридаги департамент хабар берди.

Департаментнинг Самарқанд вилояти Ургут туман бўлими томонидан ўтказилган терговга қадар текширувда, «М.V.» фермер хўжалиги раҳбари Н.М. ва бошқалар хўжаликка ижара шартномаси асосида ажратилган суғориладиган экин ер майдонида ўзбошимчалик билан уй-жой ва бошқа қурилишларни амалга оширгани аниқланган.

Бунинг оқибатида 21 сотих ер майдони яроқсиз ҳолатга келиб, давлат ва жамият манфаатларига 255,5 млн сўм зарар етказилган.

Шу каби, департаментнинг Сурёндарё вилояти Денов туман бўлими томонидан ўтказилган терговга қадар текширувда, фуқаро Й.Д. «Нуристон» маҳалласи ҳудудида захирадаги 10 сотих суғориладиган экин ер майдонини эгаллаб олиб, жами 96 квадрат метрли уй-жой қургани аниқланган.

Вилоятнинг Олтинсой туман бўлими томонидан ўтказилган терговга қадар текширувда эса, фуқаро О.О. «Ф.Қ.» фермер хўжалигига тегишли 10 сотих суғориладиган экин ер майдонини эгаллаб олиб, 64 квадрат метрли уй-жой қуриш учун бетон пойдевор ва ғишт териш ишларини амалга оширгани аниқланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.