Туркманистонда мустақиллик кунига бағишланган пойгада бир чавандоз ҳалок бўлди. Шунга қарамасдан, байрам давом этди

28 сентябрь куни Ахалтеке халқаро от спорти мажмуасида пойгалар чоғида чавандоз Иқбол Сапаров ҳалок бўлди, деб хабар бермоқда «Хроника Туркменистана».

Анъанавий байрам мусобақалари Туркманистон мустақиллик куни шарофати билан ўтказилган. Ипподромга Туркманистон президенти Сердар Бердимуҳамедов ҳам келган.

Пойга вақтида от қоқилиб кетиб, ағдарилиб тушган, чавандоз унинг остида қолган. Бўйин умуртқа поғонаси синиши натижасида ўлим юз берган. Сапаров ўша куниёқ дафн қилинган.

Фожиали воқеага қарамасдан, байрам пойгаси давом этган. Телевидение ва босма матбуот воқеа ҳақида хабар бермаган.

27 ёшли чавандоз йилқичилар сулоласи вакили бўлган. Бир неча йил аввал унинг оиласига сайислар учун қурилган уйдан хонадон совға қилинган.

Нашр эслатишича, тўрт йил аввал худди шундай вазиятда яна бир чавандоз ҳам ҳалок бўлган. Унинг ота-онаси норозилик билдирмаган, ва бола 5 ёшидан отларга боғланиб қолганини айтиб, «шундай ўлим унинг тақдирига ёзилган экан», деган хулосага келган.