Шимолий Корея Япон денгизига қарата иккита баллистик ракета учирди, деб хабар бермоқда Deutsche Welle.
Жанубий Корея ҳарбийлари маълум қилишича, улар Пхеньяннинг Сунан туманидан мамлакат шарқий сувларига қарата учирилган иккита кичик масофали баллистик ракеталарни аниқлаган. Таъкидланишича, ракеталар парвози АҚШ вице-президенти Камала Харриснинг Жанубий Кореяга ташрифи арафасида амалга оширилган.
«Ҳарбийларимиз мониторинг ва кузатувни кучайтириб, АҚШ билан яқин координацияда энг юқори шайликни сақлаб турибди», — дейилади Сеул штаб бошлиқлари бирлашган қўмитаси баёнотида.
Қўмита маълумотларига кўра, ракеталар 28 сентябрь куни маҳаллий вақт билан 18:10 да (Тошкент вақти билан 14:10) учирилган. Улар қарийб 360 км узоқликка учиб бориб, 30 км баландликкача чиққан ва соатига 7450 км тезликка эришган.
Япония қирғоқ соқчилик хизмати ҳам ракеталар учирилгани ҳақида хабар берди ва ушбу ҳудудда бўлган кемаларни огоҳ бўлишга чақирди. Япония мудофаа вазири Тосиро Ино ракеталар учирилишини «номақбул» деб атади.
«Шимолий Кореянинг кўп бора баллистик ракеталарни учиришни ҳам ўз ичига олувчи кетма-кет ҳаракатлари Япония, минтақа ва халқаро ҳамжамият тинчлиги ва хавфсизлигига таҳдид солади», — деди у.
АҚШ Ҳинд-Тинч океани қўмондонлиги аниқланган ракеталар Америка ходимлари ёки ҳудудига бевосита хавф туғдирмаслигини маълум қилди.
«Биз аввалгидек, КХДРга нисбатан дипломатик ёндашув тарафдоримиз ва КХДРни мулоқотга чақирамиз», — дейилади АҚШ Давлат департаменти баёнотида.
Эслатиб ўтамиз, август ойида Шимолий Корея Жанубий Корея етакчиси Юн Сок Ёл президентлигининг 100-кунида Ғарбий Корея кўрфази йўналишида иккита қанотли ракета учирган эди.
КХДР ўзини ўзи ядро давлати деб эълон қилди
Сентябрь бошида Шимолий Корея унга ядро давлати мақомини берувчи қонунни қабул қилиб, ўзини ўзи ядро давлати деб эълон қилганди. Бу республикага унга ҳужум қилган тақдирда душманга ядро зарбаси бериш имкониятини тақдим этади. КХДР етакчиси Ким Чен Ин Корея ярим оролини ядродан холи қилиш бўйича музокаралардан бош тортди.«Агар душман ҳужуми туфайли, давлат ядро кучларини бошқариш тизими хавф остида қолса, душман кучларини, шу жумладан, провокация манбаси ва қўмондонлик пунктини йўқ қилиш мақсадидаги ядро зарбаси олдиндан аниқлаштириб олинган режа бўйича автоматик тарзда ва зудлик билан берилади», — дейилади ҳужжатда.
Шунингдек, Ким Чен Инга ҳужум бўлган тақдирда ҳам ядро зарбаси берилиши мумкин. Шу билан бирга таъкидланишича, ядро қуроли »ташқи тажовузга қарши сўнгги чора сифатида фойдаланилади», ва Шимолий Корея уни биринчи бўлиб қўлламайди. Республика ядро қуролини бошқа мамлакатлар ҳудудларига жойлаштирмаслик ва уларга ядро қуроли билан боғлиқ технологиялар, объектлар ёки материалларни бермаслик мажбуриятини олади.
Изоҳ (0)