Украинада ҳарбий операция старт олиши биланоқ, Россия ҳарбий комиссариатларига ўт қўйиш бошланганди, етти ой ичида ҳарбий комиссариатлар ва маъмурий биноларга 50 дан ортиқ ҳужумлар амалга оширилди. Ёзга келиб, бундай ҳужумлар сони қисқара бошлади — августда бор-йўғи битта ҳолат қайд этилди, майда эса бундай воқеалар 14 тани ташкил қилганди. Аммо сафарбарлик эълон қилингач, ўт қўйишлар сезиларли даражада кўпайди. Медиазона шундай ҳодисалар ҳақида маълумот берди.
Ҳарбий комиссариатга ўт қўйилиши билан боғлиқ биринчи ҳолат ҳақида «махсус операция» бошланганидан кейин бир неча кун ўтиб, маълум бўлди. Ўшанда 21 ёшли Кирилл Бутилин Подмосковедаги Луковици шаҳрида ҳарбий комиссариатга «Молотов коктейллари»ни улоқтирганди. 8 март куни Telegram-каналлардан бирида воқеа акс этган видео пайдо бўлганди. Бутилин чақирувчиларнинг шахсий ҳужжатлар тўпламларидан иборат архивни йўқ қилиб, сафарбарликка халал бериш мақсадида ҳарбий комиссариатни ёқиб юборганини маълум қилган. «Синфдошларимни асирга тушганлар орасида ёки ҳалок бўлганлар рўйхатида кўрмайман, деб умид қиламан», — деб ёзган у ўз постида.
Бутилин ушбу постини эълон қилган куниёқ қўлга олинган. Россиянинг баъзи ОАВлари хабарига кўра, бу вақтгача у Литва ва Беларусь чегарасигача етишга улгурган, у ердан эса Россияга юборилган ва Луковицида полиция бўлинмасига келтирилган. 13 март куни, ИИВ хабарига қараганда, у полиция бўлими биносини ўзбошимчалик билан тарк этган», бироқ кечқуруноқ яна ушланган.
Дастлаб Бутилинга вандализм ҳақидаги модда бўйича иш очилган, бироқ бу модда тез орада «ўт қўйиш»га ўзгартирилган, кейинроқ эса ишга «терактни амалга ошириш» ҳам қўшилган. Июнь ойида Бутилин террорчилар ва экстремистлар рўйхатига киритилган. У 20 йилгача озодликдан маҳрум этилиши мумкин.
«Медиазона» ҳисоб-китобларига кўра, уруш бошланганидан буён Россиянинг қарийб 40 та ҳудудида ҳарбий комиссариатларга ва бошқа давлат муассасаларига 50 дан ортиқ ҳужумлар амалга оширилган. Акцияларнинг кўпчилигидан етган зарар аҳамиятсиз бўлган. Ҳужумлар кўпроқ рамзий маънога эга бўлган — «қаердадир бинонинг фақат деразалари, эшиги ёки деворининг юза қисми ёниб кетган, қаердадир эса мол-мулкка умуман зиён етмаган», — дейилади хабарда.
Аммо баъзи ҳолларда етказилган зарар катта бўлган. Собиқ қишлоқ ўқитувчиси Иля Фарбер икки кунлик фарқ билан Удмуртиянинг Игра қишлоғида ҳарбий комиссариатга ва чақирув пунктига ўт қўйган. Биринчи ҳолатда Иккинчи жаҳон уруши фахрийларининг хизмат ҳужжатлари ва картотекаси сақланган хона ёниб кетган бўлса, иккинчи ҳолатда ходимларнинг шахсий буюмларидан иборат хона ёнғин ичида қолган.
Яна иккита йирик ёнғин Посмосковедаги Шелково шаҳрида (маҳаллий ҳарбий комиссариатда иккита кабинет ва архив зарар кўрди) ва Мордовиянинг Зубова Поляна қишлоғида (ёнғин иккита қаватни, шу жумладан, ҳарбий хизматга чақирилувчилар маълумотлари сақланадиган хоналарни қамраб олди) содир бўлди.
Ҳарбий комиссариатлардан ташқари, маҳаллий маъмуриятлар, полиция, ФХХ ва Росгвардия бинолари ҳам ҳужумлар нишонларига айланди. ФХХ биноларига ҳужумлар Краснодар ва Нижний Новгородда, полиция бўлимларига ҳужумлар эса Москва, Доғистон ва Владивостокда содир бўлди. Комсомолск-Амурда 50 ёшли эркак Росгвардия бўлинмасига ўт қўйишга уринди.
Май ўрталарида рассом Богдан Зиза Евпатория маъмурияти биносининг олд томонига сариқ ва кўк бўёқларни сепиб юборди, сўнг, тергов версиясига кўра, бинога портловчи аралашма солинган шишани улоқтирди, бироқ у портламади. Рассом қўлга олинган, у тергов изоляторида. Унга нисбатан теракт тайёрлаш ҳақида жиноят иши очилган.
Таъкидланишича, дастлаб ўт қўйишлар ҳақидаги ишлар «безорилик» ёки «мол-мулкка қасддан зарар етказиш» каби нисбатан енгил моддалар доирасида кўриб чиқилган. Бироқ ёзга яқин ҳуқуқ-тартибот органлари уларни анча оғирроқ жиноятлар деб баҳолай бошлади. Масалан, баҳорда Иванов вилоятида ҳарбий комиссариатга ўт қўйишга уринганлик учун ҳибсга олинган Дмитрий Лямин июль бошида теракт амалга оширишда айбланди.
Июнь бошида ҳарбий комиссариат биносига ёниб турган латтани улоқтирган владивостоклик 21 ёшли Андрей Алексеев ва июнь ўрталарида ФХХнинг Краснодар бошқармаси биноси яқинида гиламчани ёқиб юборган 46 ёшли Игорь Паскар ҳам терроризмда айбланди. Угличнинг 21 ёшли фуқароси теракт амалга оширишга уринишда айбланди — у ҳарбий комиссариат яқинида «Молотов коктейллари» билан қўлга олинганди.
Нашр тахмин қилишича, сафарбарлик бошланганидан кейин бундай ишлар янада кўпаяди. 21 сентябрдан кейин содир этилган ўт қўйиш билан боғлиқ 18 та ҳолат туфайли тўрт киши қўлга олинган. Уларга айнан қандай моддалар бўйича айбловлар қўйилиши номаълум. Урушнинг ярим йили ичида ҳарбий комиссариатларга ўт қўйилиши ҳақидаги жиноят ишларининг бирортаси ҳам судгача бориб етгани йўқ.
Изоҳ (0)