Россия ҳукумати томонидан эълон қилинган сафарбарлик мамлакат фуқароларининг ҳаракатланиши чекланишини назарда тутмайди. Бу ҳақда мамлакат Мудофаа вазирлиги маълум қилди.
«Россия Мудофаа вазирлиги ойдинлик киритади: Россия Федерациясида қисман сафарбарлик ўтказилиши шароитларида фуқароларнинг ҳаракатланишига нисбатан чекловлар назарда тутилмайди», — дейилади идоранинг расмий Telegram-каналида.
Мудофаа вазирлиги баёнотида гап Россия ичкарисида ҳаракатланиш ҳақида ёки чет элга сафарлар ҳақида бораётгани ноаниқ. Идора бу борада батафсил изоҳлар бермаган.
25 сентябрдан чақириқ ёшидаги эркаклар чегарадан чиқарилмаётгани ҳақида алоҳида хабарлар пайдо бўла бошлади. Чегарачилар ўз хатти-ҳаракатларини сафарбарлик тўғрисидаги қонун билан изоҳламоқда. Ҳуқуқшунослар бундай ҳаракатларни қонунга зид деб баҳоламоқда.
26 сентябрь куни аэропортлардаги чегарачиларга сафарбарликка жалб этиладиган одамлар рўйхати берилгани маълум бўлди. Ушбу фуқаролардан чегарани кесиб ўтиш учун ҳарбий комиссариатдан берилган маълумотномалар талаб қилинмоқда.
Россияда нималар бўляпти?
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва шошилинч хизмат ҳарбий хизматчилари сафарбар этилмайди, деган эди Шойгу.
Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.
Чақирув ёшидаги фуқаролар мамлакатни тарк этиши тақиқланмоқда
Дастлаб Россия ҳудудларидаги ҳарбий комиссарлар сафарбарлик бўйича армияга чақирилиши керак бўлган одамларга ўз шаҳри ёки туманини тарк этишни тақиқлаганди, бироқ 23 сентябрга келиб, уларнинг буйруқларида Россиядан чиқиш кетишга нисбатан тақиқлар пайдо бўлди.Meduza манбалари маълум қилишича, ДХР, ЛХР ва Украинанинг Херсон ва Запорожье вилоятларидаги босиб олинган ҳудудларда «референдум» тугаганидан кейин сафарбарлик ёшидаги эркакларга Россиядан чиқиб кетиш тақиқланиши кутилмоқда. Тақиқ 28 сентябрь куни киритилиши мумкин.
Сафарбарлик ҳақида эълон қилинганидан кейин Россия ҳудудини 261 минг нафар эркак тарк этган.
Изоҳ (0)