Россия президенти Владимир Путин америкалик Эдвард Сноуденга Россия фуқаролигини тақдим этди. Бу ҳақдаги фармон ҳуқуқий ахборот расмий интернет-порталига жойланди, деб ёзади Meduza.
«Интерфакс» Сноуденнинг манфаатларини ҳимоя қилувчи адвокат Анатолий Кучерена билан боғланиб, унинг мижози сафарбарлик доирасида Россия армиясига чақирилиш-чақирилмаслиги билан қизиқди. «Эдвард Россия армиясида хизмат қилмагани, ҳарбий хизмат бўйича амалиёт ва тажрибага эга бўлмагани сабабли, у сафарбарликка жалб этилмайди», — деб жавоб берди Кучерена.
Нашр қайд этишича, Россияда ҳарбий хизмат ўтамаган фуқароларнинг армияга чақирилиши билан боғлиқ бирорта ҳам ҳолат кузатилмаган.
Сноуден Америка Марказий разведка бошқармаси ва Миллий хавфсизлик агентлиги собиқ ходими бўлиб, 2013 йилда АҚШ махсус хизматларининг фуқароларни кузатиш усулларини фош қилган ва дунё етакчилари телефонлари тингланиши ҳақида айтиб берган эди. АҚШда у жосусликда ва давлат мулкини ўғирлаганликда айбланмоқда. У махфий маълумотларни фош қилгани учун 30 йилга қамалиши мумкин.
Сноуден дастлаб Гонконгга, сўнг Россияга қочган. «Шереметьево» аэропортининг транзит зонасида бир ойдан кўп вақт яшаган. Сўнг Сноуденга Россияда вақтинчалик бошпана тақдим этилган. 2020 йилда у ушбу мамлакатда муддатсиз яшаш учун рухсатномага эга бўлди ва Россия фуқаролигини олиш учун ариза берди.
Изоҳ (0)