Ўзбекистонда озиқ-овқат чиқиндиларидан биоёнилғи ишлаб чиқариш имкониятлари таҳлил қилинди. Бу ҳақда Прогнозлаштириш ва макроиқтисодий тадқиқотлар институти (ПМТИ) хабар бермоқда.
Биоёнилғи — бу тўғридан-тўғри ёки билвосита биомассадан олинадиган ёнилғи. Бугунги кунда энг кенг тарқалган биоёнилғи турлари бу биоэтанол ва биодизелдир.
Биоёнилғи Европа, АҚШ ва бошқа кўплаб мамлакатларда ёнилғи сифатида ишлатилади. АҚШда бензиннинг тахминан 97 фоизида этанол бор. Бразилияда сотиладиган барча бензин маркаларида 20-25 фоизгача этанол мавжуд.
Ўзбекистонда ҳар йили қарийб 3 миллион тонна озиқ-овқат чиқиндилари ҳосил бўлади.
Озиқ-овқат чиқиндиларидан биоёнилғи ишлаб чиқариш бир вақтнинг ўзида параллел равишда иккита муаммони ҳал қилишда ёрдам беради.
Биринчидан, озиқ-овқат чиқиндиларини утилизация қилиш орқали экологияга кўрсатилаётган салбий таъсир камайтирилади. Иккинчидан, иқтисодий ва демографик ўсиш натижасида тобора ортиб бораётган энергия ресурсларига бўлган эҳтиёж қондирилади.
Таҳлил натижасида қуйидагилар аниқланди:
- Агар озиқ-овқат чиқиндилари тўлиқ биоэтанол (E100) ёки биодизель (B100) га айлантирилса, потенциал биоёқилғи ишлаб чиқариш ҳажми мос равишда 1,11 миллиард литр ва 1,02 миллиард литрни ташкил қилади;
- Бензин ва дизель ёнилғисида ҳаракатланувчи автомобилларда биоёнилғидан фойдаланиш CO2 чиқиндиларини 1,6 миллион тоннага камайтиришда ёрдам беради (21 фоизга);
- Озиқ-овқат чиқиндиларининг ҳар бир килограми йилига ўртача 2,5 кг карбон диоксиди ажратиб чиқаради. 3 миллион тонна озиқ-овқат чиқиндиси ўрнатилган тартибда утилизация қилинмаса, 7,5 миллион тонна иссиқхона газларини чиқарилади.
Изоҳ (0)