Ўзбекистон ва Қозоғистон имкон қадар тезроқ Халқаро саноат кооперацияси марказини (ХСКМ) ташкил этиш бўйича келишувга эришди. Бу ҳақда Инвестициялар ва ташқи савдо вазирлиги матбуот хизмати маълум қилди.
Қайд этилишича, бундай қарор Ўзбекистон Бош вазири ўринбосари, инвестициялар ва ташқи савдо вазири Жамшид Хўжаев ҳамда Қозоғистон Бош вазири ўринбосари, савдо ва интеграция вазири Серик Жумангарин бошчилигидаги делегацияларнинг музокаралари чоғида қабул қилинган.
Хусусан, саноат кооперациясини ривожлантириш масалалари кўриб чиқилди. Халқаро саноат кооперацияси марказининг (ХСКМ) ташқи ва ички инфратузилмасини ташкил этиш бўйича лойиҳа-смета ҳужжатларини, шунингдек, ХСКМ фаолиятини тартибга солувчи тегишли ҳукуматлараро битимни қисқа муддатда ишлаб чиқишга келишилди, — дейилади хабарда.
Томонлар, шунингдек, автомобилсозлик, фосфорли ва мураккаб минерал ўғитлар ишлаб чиқариш, электротехника саноатида қўшма лойиҳаларни амалга ошириш имкониятларини кўриб чиқди.
Бундан ташқари фармацевтика маҳсулотлари ишлаб чиқариш ва қишлоқ хўжалигида ўзаро ҳамкорлик масалаларини муҳокама қилди.
Дори воситаларини рўйхатга олишни соддалаштириш ва қишлоқ хўжалиги маҳсулотларини етказиб бериш бўйича форвард шартномаларини тузган ҳолда биргаликда ишлаб чиқаришни ташкил этиш бўйича келишувга эришилди.
Музокаралар чоғида транспорт-логистика соҳасидаги ҳамкорликни ривожлантириш истиқболлари, жумладан, темир йўл ва автомобиль йўналишларини диверсификация қилиш ҳамда икки давлат ўртасидаги авиақатновлар сонини ошириш масалалари таҳлил қилинди.
Аввалроқ Ўзбекистон Марказий Осиёдаги қайси давлатлар билан энг кўп савдо қилиши маълум бўлган эди.
Изоҳ (0)