«СНГ Главное» Telegram-канали Telegram мессенжери асосчиси Павел Дуровга мурожаат қилиб, Марказий Осиё мамлакатлари фуқароларига огоҳлантирувчи билдиришномалар юборишни сўради.
«Сизга Россиядаги сўнгги воқеалар муносабати билан мурожаат қилмоқдамиз. Яъни сафарбарлик билан боғлиқ вазият туфайли. Биласизки, Россияда Марказий Осиё мамлакатларидан келган меҳнат муҳожирларини ‘кўнгиллилар’ сафига жалб қилиш учун фаол пропаганда ва уринишлар олиб борилмоқда. Уларнинг кўпчилиги маълумоти кам одамлар, уларни алдашмоқда, баъзиларни эса пул ёки фуқаролик бериш ҳақидаги ваъдалар билан ўз томонига оғдирмоқда. Яна шундай ҳолатлар ҳам бўляптики, уларнинг паспортлари олиб қўйилиб, ўзлари тўп еми сифатида қизғин уруш бораётган нуқталарга юборилмоқда!» — дейилади мурожаатда.
Павел Дуровдан иккала томондан ҳам одамлар ҳаётларини сақлаб қолишда ёрдам сўрашган. «Сизнинг жамоангиз пандемия чоғида хабарномалар жўнатиб, мамлакатлар билан аъло даражада ишлаганини биламиз», — дея Марказий Осиё мамлакатлари фуқароларига икки хил — ўзларининг она тилида ва рус тилида хабарномалар жўнатилишини ташкиллаштиришда ёрдам сўралган.
Қайд этилишича, Марказий Осиё мамлакатларида давлат органлари ўз саҳифаларида, каналларида хабарлар эълон қилмоқда, бироқ «улар пропаганда кучи, унинг даҳшатли кучи билан тенг кела олмайди».
Аввалроқ Бош прокуратура хориждаги ўзбекистонликларга мурожаат қилиб, уларни чет давлатлар ҳарбийлашган тузилмаларига ёлланиш жавобгарликка сабаб бўлишидан огоҳлантирганди. Шунингдек, Ўзбекистоннинг Россиядаги элчихонаси фуқароларни ҳарбий ҳаракатларда иштирок этмасликка чақирди.
Эслатиб ўтамиз, 21 сентябрь куни Путин Россияда қисман сафарбарлик эълон қилиш ҳақидаги фармонни имзолади.
Унинг айтишича, муддатли ҳарбий хизматга фақат ҳозирда захирада бўлганлар, биринчи навбатда, Қуролли Кучлар сафида муддатли ҳарбий хизматни ўтаган, муайян ҳарбий мутахассислик ва тегишли тажрибага эга бўлган фуқароларгина чақирилади. Шунингдек, муддатли ҳарбий хизматга чақирилганлар бўлинмаларга жўнатилишдан олдин «махсус ҳарбий операция» учун қўшимча ҳарбий тайёргарликдан ўтади.
Сафарбарлик тадбирлари 21 сентябрь куни бошланади. Путин ҳудудлар раҳбарларига «ҳарбий комиссарликлар иши учун зарур барча ёрдамни кўрсатишни» буюрди.
Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади.
Вазирнинг аниқлик киритишича, захирада бўлган Россия фуқаролари чақирилади, талабаларни сафарбарлик қилиш ҳақида гап бормаяпти, шунингдек, чақириқ бўйича хизмат ўтаётганлар ҳам сафарбар этилмайди.
Изоҳ (0)