Алишер Узоқов туркиялик актёрлар Бурак Ўзчивит ва Нургул Ешилчайнинг Тошкент халқаро кинофестивалида ўз ҳамкасбларига нисбатан ҳурматсизлик қилганига муносабат билдирди.
«Ўша куни саҳнага ҳаммага етарли стул олиб чиқиб қўйилган ҳамда дастур бўйича турк актёрларининг ҳаммаси саҳнага бирма-бир чақирилиб, ўша ерда ўтириши керак эди. Нургул ва Бурак охирида чиқиши керак эди, лекин улар чиқмади. Саҳнада жуда катта тажрибали актёр ҳам бор эди, ‘Эртуғрул’ сериалида бошқа қаҳрамоннинг отаси ролини ўйнаган 75 ёшли турк актёри Сердар Гокҳан ҳам бор эди. Нургул ва Бурак улар билан битта саҳнага чиқмаймиз, деди. Кейин ёши катта таниқли турк актёрлари совға-салом берилиб, саҳнадан туширилди ҳамда улар залдаги биринчи қатордан жой олишди. Шундан кейин Нургул Ешилчай саҳнага чиқиб, ўзини кўрсатди. Жуда ўзини оладиган актриса экан. Шунда 75 ёшли отахон актёр саҳнага чиқиб, томошабинларга ‘Сизлар буларнинг ташқи кўринишига, машҳурлигига қараб баҳо берманглар. Аввало яхши инсон бўлиши керак. Инсоннинг қалбига қараб баҳо беринглар’, дедилар. Мен уларнинг гапларига юз фоиз қўшиламан. Балки уларнинг саҳна ортида қандайдир келишмовчиликлари бўлгандир, лекин у нарса саҳна ортида қолиши керак эди. Томошабинларга нисбатан ҳурматсизлик қилмасликлари керак эди. Нургул Буракдан ўтиб тушадиган даражада оғир феъл-атворга эга экан», — дейди Алишер Узоқов.
Шунингдек, актёрнинг айтишича, унинг Бурак билан суҳбати жараёнида ўзини тутиши ҳам ижтимоий тармоқларда муҳокама қилинган. Айримлар актёрнинг Буракнинг олдига бормай, қўлини чўнтагига солиб турганини кибрга йўйган.
«Сизлар Бурак Ўзчивитнинг ашаддий мухлиси бўлсанглар, у билан кўришганингларда ўзингларни унинг оёғи остига ташларсизлар, балки, лекин бу менга тўғри келмайди. Мен ўзимни у билан тенглаштирмоқчи эмасман, у жаҳон юлдузи, тўғри. Мен эса Ўзбекистондаги оддий актёрсифат, ўртамиёна бир одамман. Лекин одам ким бўлишидан, қандай даражада машҳур бўлишидан қатъий назар ўзидан катта, 75 ёшли актёрларни ҳурмат қилиши керак. Менинг унинг олдига бормай, қўлимни чўнтагимга солиб туришим аслида унга кам, мен ўшанда ҳатто саҳнага чиқмайман ҳам дедим. Чунки инсон ўзини ҳурмат қилмас экан, ҳеч қачон уни биров ҳурмат қилмайди», — дейди актёр.
Изоҳ (0)