Alisher Uzoqov turkiyalik aktyorlar Burak O‘zchivit va Nurgul Yeshilchayning Toshkent xalqaro kinofestivalida o‘z hamkasblariga nisbatan hurmatsizlik qilganiga munosabat bildirdi.
“O‘sha kuni sahnaga hammaga yetarli stul olib chiqib qo‘yilgan hamda dastur bo‘yicha turk aktyorlarining hammasi sahnaga birma-bir chaqirilib, o‘sha yerda o‘tirishi kerak edi. Nurgul va Burak oxirida chiqishi kerak edi, lekin ular chiqmadi. Sahnada juda katta tajribali aktyor ham bor edi, ‘Ertug‘rul’ serialida boshqa qahramonning otasi rolini o‘ynagan 75 yoshli turk aktyori Serdar Gokhan ham bor edi. Nurgul va Burak ular bilan bitta sahnaga chiqmaymiz, dedi. Keyin yoshi katta taniqli turk aktyorlari sovg‘a-salom berilib, sahnadan tushirildi hamda ular zaldagi birinchi qatordan joy olishdi. Shundan keyin Nurgul Yeshilchay sahnaga chiqib, o‘zini ko‘rsatdi. Juda o‘zini oladigan aktrisa ekan. Shunda 75 yoshli otaxon aktyor sahnaga chiqib, tomoshabinlarga ‘Sizlar bularning tashqi ko‘rinishiga, mashhurligiga qarab baho bermanglar. Avvalo yaxshi inson bo‘lishi kerak. Insonning qalbiga qarab baho beringlar’, dedilar. Men ularning gaplariga yuz foiz qo‘shilaman. Balki ularning sahna ortida qandaydir kelishmovchiliklari bo‘lgandir, lekin u narsa sahna ortida qolishi kerak edi. Tomoshabinlarga nisbatan hurmatsizlik qilmasliklari kerak edi. Nurgul Burakdan o‘tib tushadigan darajada og‘ir fe’l-atvorga ega ekan”, — deydi Alisher Uzoqov.
Shuningdek, aktyorning aytishicha, uning Burak bilan suhbati jarayonida o‘zini tutishi ham ijtimoiy tarmoqlarda muhokama qilingan. Ayrimlar aktyorning Burakning oldiga bormay, qo‘lini cho‘ntagiga solib turganini kibrga yo‘ygan.
“Sizlar Burak O‘zchivitning ashaddiy muxlisi bo‘lsanglar, u bilan ko‘rishganinglarda o‘zinglarni uning oyog‘i ostiga tashlarsizlar, balki, lekin bu menga to‘g‘ri kelmaydi. Men o‘zimni u bilan tenglashtirmoqchi emasman, u jahon yulduzi, to‘g‘ri. Men esa O‘zbekistondagi oddiy aktyorsifat, o‘rtamiyona bir odamman. Lekin odam kim bo‘lishidan, qanday darajada mashhur bo‘lishidan qat’iy nazar o‘zidan katta, 75 yoshli aktyorlarni hurmat qilishi kerak. Mening uning oldiga bormay, qo‘limni cho‘ntagimga solib turishim aslida unga kam, men o‘shanda hatto sahnaga chiqmayman ham dedim. Chunki inson o‘zini hurmat qilmas ekan, hech qachon uni birov hurmat qilmaydi”, — deydi aktyor.
Izoh (0)