Самарқанд шаҳрида бўлиб ўтаётган Шанхай ҳамкорлик ташкилоти саммити доирасида Қозоғистон президенти Қосим Жўмарт Тўқаев Эрон президенти Иброҳим Раисий билан учрашди.
Хусусан, Қозоғистон томони Эронга қисқа муддатда етказиб берилиши мумкин бўлган товарлар рўйхатини тайёрлаган. Шунингдек, Қозоғистон томони Эрон томонининг худди шундай рўйхатини кўриб чиқишга ва қўллаб-қувватлашга тайёр.
Бу ўзаро товар айирбошлаш ҳажмини 3 миллиард долларга етказиш мақсадига эришишга ёрдам беради. Қозоғистон раҳбари июнь ойида Теҳронда давлат раҳбарлари томонидан пойдевор қўйилган транзит-транспорт йўлаги муваффақиятли ривожланаётганини мамнуният билан қайд этди.
Мулоқот чоғида транзит юк оқимини янада ошириш мақсадида Қозоғистон–Туркманистон–Эрон темир йўл линияси салоҳиятини ривожлантириш муҳимлиги, шунингдек, мамлакатлар портлари ўртасида мунтазам паром қатнови имкониятларидан фойдаланиш зарурлиги таъкидланди.
Қозоғистон президенти Эроннинг ШҲТга тўлақонли аъзо бўлиш истагини олқишлади ва ташкилотга аъзо бўлиш минтақавий ҳамкорликни мустаҳкамлашига ишонч билдирди.
Эрон президенти ҳамкорликни мустаҳкамлаш тарафдори эканини яна бир бор тасдиқлаб, Эрон ва Қозоғистон ўртасидаги савдо-иқтисодий ҳамкорлик учун кенг имкониятлар мавжудлигини қайд этди. Иброҳим Раисий эришилган келишувлар келгусидаги яқин ҳамкорлик учун мустаҳкам пойдевор бўлишига ишонч билдирди.
Мулоқот сўнгида Тўқаев Қозоғистон Эрон билан ҳамкорликни ҳар томонлама мустаҳкамлаш йўлига қатъий содиқ эканини таъкидлади ва ҳамкасбини Қозоғистонга жавоб ташрифи билан келишга таклиф қилди.
Изоҳ (0)