Samarqand shahrida bo‘lib o‘tayotgan Shanxay hamkorlik tashkiloti sammiti doirasida Qozog‘iston prezidenti Qosim Jo‘mart To‘qayev Eron prezidenti Ibrohim Raisiy bilan uchrashdi.
Xususan, Qozog‘iston tomoni Eronga qisqa muddatda yetkazib berilishi mumkin bo‘lgan tovarlar ro‘yxatini tayyorlagan. Shuningdek, Qozog‘iston tomoni Eron tomonining xuddi shunday ro‘yxatini ko‘rib chiqishga va qo‘llab-quvvatlashga tayyor.
Bu o‘zaro tovar ayirboshlash hajmini 3 milliard dollarga yetkazish maqsadiga erishishga yordam beradi. Qozog‘iston rahbari iyun oyida Tehronda davlat rahbarlari tomonidan poydevor qo‘yilgan tranzit-transport yo‘lagi muvaffaqiyatli rivojlanayotganini mamnuniyat bilan qayd etdi.
Muloqot chog‘ida tranzit yuk oqimini yanada oshirish maqsadida Qozog‘iston–Turkmaniston–Eron temiryo‘l liniyasi salohiyatini rivojlantirish muhimligi, shuningdek, mamlakatlar portlari o‘rtasida muntazam parom qatnovi imkoniyatlaridan foydalanish zarurligi ta’kidlandi.
Qozog‘iston prezidenti Eronning SHHTga to‘laqonli a’zo bo‘lish istagini olqishladi va tashkilotga a’zo bo‘lish mintaqaviy hamkorlikni mustahkamlashiga ishonch bildirdi.
Eron prezidenti hamkorlikni mustahkamlash tarafdori ekanini yana bir bor tasdiqlab, Eron va Qozog‘iston o‘rtasidagi savdo-iqtisodiy hamkorlik uchun keng imkoniyatlar mavjudligini qayd etdi. Ibrohim Raisiy erishilgan kelishuvlar kelgusidagi yaqin hamkorlik uchun mustahkam poydevor bo‘lishiga ishonch bildirdi.
Muloqot so‘ngida To‘qayev Qozog‘iston Eron bilan hamkorlikni har tomonlama mustahkamlash yo‘liga qat’iy sodiq ekanini ta’kidladi va hamkasbini Qozog‘istonga javob tashrifi bilan kelishga taklif qildi.
Izoh (0)