Қозоғистон президенти Қосим-Жўмарт Тўқаев парламент депутатларининг мамлакат пойтахти номини Нур-Султондан Остонага қайта ўзгартириш ташаббусини қўллаб-қувватлади, деб ёзади Meduza Тўқаевнинг матбуот котиби Руслан Желдибайга таяниб.
«Президент депутатларнинг ушбу ташаббусидан хабардор, улар эса, ўз навбатида, аҳоли билан учрашувларда айтилган таклифларга, шунингдек, референдум чоғида фуқаролар томонидан қилинган кўп сонли мурожаатларга таянган. Парламент аъзолари таклифлари давлат раҳбарининг розилиги билан Конституциявий қонун лойиҳасига киритилди», — деди президент матбуот котиби.
Унинг қайд этишича, Тўқаев «Нурсултон Назарбоевнинг Қозоғистон замонавий давлатчилиги мустаҳкамланиши ва пойтахт ташкил топишидаги ҳал қилувчи ролини тарихий факт деб ҳисоблайди». Президентнинг фикрича, дея қўшиб қўйди у, Назарбоевнинг номи берилган бошқа объектлар ўз номларини сақлаб қолиши керак.
Қозоғистон пойтахтининг номи 2019 йил мартида, Тўқаев ўз инаугурация нутқи чоғида тегишли таклифни илгари сурганидан кейин Остонадан Нур-Султонга ўзгартирилган эди.
Қозоғистон пойтахти 1998 йилдан буён Остона деб аталган. Унгача шаҳар 1992 йилдан кейин Акмола деб номланган ва ўша пайтда пойтахт бўлмаган (Олмаота шаҳри шундай мақомга эга бўлган). Акмола 1961 йилдан 1992 йилга қадар Целиноград, ундан ҳам аввал эса Акмолинск деб аталган.
Нурсултон Назарбоев Қозоғистоннинг биринчи президенти бўлиб, бу лавозимни 1991 йил декабридан 2019 йил мартигача эгаллаб келган. Назарбоевнинг давомчиси Тўқаев бўлди. Назарбоев, президент лавозимидан кетиб, Қозоғистон Хавфсизлик кенгашига раҳбарлик қилишда давом этди, унинг қариндошлари эса раҳбарлик лавозимларини сақлаб қолди.
2022 йил январида Қозоғистонда газ нархи ошишига қарши норозиликлар катта кўламли тартибсизликларга айланиб кетди. Уларни бостириш учун Тўқаев, хусусан, КХШТ мамлакатлари қуролли кучларини таклиф қилди. Тартибсизликлар фонида Назарбоев Хавфсизлик кенгаши раҳбари лавозимидан туширилди, унинг қариндошлари эса давлат ва тижорат тузилмаларидаги лавозимларидан айрилди.
Изоҳ (0)