SpaceX ва Tesla компаниялари асосчиси Илон Маск май ойида Twitter ижтимоий тармоғини сотиб олиш ҳақидаги битимни кечиктиришни таклиф қилган ва буни Россиянинг Украинага бостириб кириши туфайли янги жаҳон уруши бошланиши мумкинлиги билан изоҳлаган. Бу ҳақда Маскнинг Twitter’ни сотиб олишдан бош тортгани ҳақидаги иш бўйича дастлабки эшитувлар чоғида маълум бўлди, деб ёзади Meduza.
6 сентябрь куни Делавер штат судида Илон Маск ва олди-сотди битими билан шуғулланган Morgan Stanley банкири ўртасидаги ёзишмалар ошкор этилди. Буни Twitter компанияси манфаатларига вакиллик қилаётган адвокат Уильям Севитт амалга оширган.
2022 йил 8 майдаги матнли хабарида Маск Россия президенти Владимир Путиннинг Қизил Майдондаги Ғалаба кунига бағишланган нутқини тинглаш учун битимни «бир неча кунга» кечиктиришни таклиф қилган. «Келинг, бир неча кунга кечиктирамиз. Путиннинг эртанги нутқи ростан ҳам муҳим. Агар биз учинчи жаҳон урушига қараб кетаётган бўлсак, Twitter’ни сотиб олиш мантиқсиз», — деб ёзган Маск.
9 май кунги нутқида Владимир Путин «НАТО блоки бизга тегишли ҳудудларни фаол равишда ҳарбий ўзлаштириб ола бошлагани»дан кейин Россия Украинада «махсус операция» бошлаганини маълум қилди. Путиннинг сўзларига кўра, «Россия тажовузга қарши олдини олувчи зарба берган».
Маскнинг адвокати Алекс Спиро бунга жавобан, ҳар қандай бизнесмен потенциал урушнинг фонд бозорига таъсиридан хавотир олган бўлишини билдирди. Адвокатнинг қўшимча қилишича, Маскнинг гаплари контекстдан юлиб олинган.
2022 йил апрелида Илон Маск Twitter компаниясини 44 миллиард долларга сотиб олишни таклиф қилган эди. Июль ойи бошида бизнесмен компания ижтимоий тармоқдаги ботлар сонини ҳисоблаб чиқиш учун маълумотлар тақдим этмаганини, бу реклама аудиториясини тушуниш учун муҳим эканлигини айтди. Twitter Маскнинг олди-сотдидан бош тортиш сабабини уйдирма деб атади ва суддан Маскка битимни амалга ошириш мажбуриятини юклашни талаб қилди. Маск бунга жавобан судга ўз даъвосини киритди.
Изоҳ (0)