Покистон ҳукумати мамлакатдаги энг катта чучук сувли кўлни қуритишга ҳаракат қилмоқда, аммо учинчи уриниш ҳам муваффақиятсиз тугади, деб ёзади Deutsche Welle.
Бир неча ҳафта давом этган вайронкор тошқинлардан сўнг Синд провинциясидаги Манчар кўлида сув сатҳи хавфли даражага етган.
«Кўл туфайли минглаб одамларнинг ҳаёти хавф остида қолмоқда», — деди провинция ҳукумати матбуот котиби Муртазо Ваҳоб.
Расмийнинг таъкидлашича, тўғонларни бузиш орқали сув сатҳини пасайтиришга қаратилган саъй-ҳаракатларга қарамай, сув оқимининг давом этиши олдинга силжишга тўсқинлик қилмоқда.
Унинг сўзларига кўра, 100 мингга яқин фуқаро уйларини тарк этишга мажбур бўлган. Агар кўл сувга лиқ тўлса, яна юз минглаб одамларни эвакуация қилишига тўғри келади.
Кучли ёмғирлар сабаб Покистон ҳудудининг учдан бир қисми сув остида қолган. БМТ ва баъзи хорижий ҳукуматлар мамлакатга юз миллионлаб доллар ёрдам ваъда қилган бўлса-да, Исломобод вайронагарчиликни қайта тиклаш камида 10 миллиард долларга тушади, деб ҳисобламоқда.
Изоҳ (0)