Ilon Mask uni sudga bergan Twitter kompaniyasiga qarshi da’vo kiritdi

Biznesmen Ilon Mask Twitter kompaniyasiga nisbatan qarshi da’vo bilan sudga murojaat qildi, deb yozadi Meduza.

Maskning advokatlari da’voning tafsilotlarini oshkor qilmaslikka chaqirdi. Shu bilan birga, telekanal qayd etishicha, sud qoidalariga ko‘ra, bu axborot bir qancha vaqtdan keyin omma ixtiyoriga havola etilishi mumkin.

Twitter’ning biznesmendan ushbu kompaniyani sotib olish jarayonini oxirigacha yetkazish talabi ilgari surilgan da’vosini ko‘rib chiqishni sud 17-oktabrga belgilaganidan keyin bir necha soat o‘tib, Ilon Mask sudga o‘z da’vosini kiritdi.

Ilon Mask Twitter soxta akkauntlar va spam-botlar haqida ma’lumot taqdim etmagani uchun, uni sotib olish haqidagi bitimdan voz kechgani 9-iyul kuni ma’lum bo‘ldi. Natijada 12-iyulga kelib, Twitter aksiyalari 11 foizga tushib ketdi.

OAVlarda Twitter sudga da’vo kiritishi haqida xabarlar paydo bo‘lgach, Mask ijtimoiy tarmoqqa post joylab, sudlashuv chog‘ida kompaniya spam-botlar va feyk-akkauntlar haqidagi ma’lumotlarni fosh qilishga majbur bo‘lishini aytdi.

Dunyoning eng boy odami (uning boyligi Forbes ma’lumotlari bo‘yicha 2022-yil apreli holatiga 219 milliard dollarni tashkil qiladi) Mask aprel oyida ijtimoiy tarmoqni 44 milliard dollarga sotib olmoqchi edi. Ammo keyinroq soxta va spam-akkauntlar Twitter umumiy foydalanuvchilari sonining 5 foizdan kamrog‘ini tashkil etishi haqidagi ma’lumotlar tasdiqlanguniga qadar olti-sotdi bitimini to‘xtatib qo‘ydi.

Aprel boshida Mask dastlab Twitter’ning 9,2 foiz ulushini sotib oldi va eng yirik aksiyadorlardan biriga aylandi, keyinroq esa ijtimoiy tarmoqni sotib olish niyatini ma’lum qildi va bitta aksiya uchun 54,20 dollardan taklif qildi.

Reuters agentligi Twitter’ning 2-maydagi hisobotiga tayanib, qalbaki akkauntlar va spam-botlar kundalik faol foydalanuvchilarning ko‘pi bilan 5 foizini tashkil etishini ma’lum qilgandi.

Biroq tadbirkor buni o‘zi tekshirib ko‘rishga qaror qildi. 100 ta tasodifiy hisob yozuvlarini tanlab olib, u feyk akkauntlar barcha foydalanuvchilarning kamida 20 foizini tashkil etadi, degan xulosaga keldi.

Shundan keyin Twitter sud orqali Tesla va SpaceX rahbari Ilon Maskdan ijtimoiy tarmoqni 44 milliard dollarga sotib olish bo‘yicha bitimni oxiriga yetkazishni talab qildi, kompaniya uni platforma va uning aksiyadorlari qarshisidagi majburiyatlarini bajarishdan bosh tortishda aybladi.