Венгрия Евроиттифоқдан Алишер Усмонов ва яна икки нафар россиялик бизнесменга нисбатан санкцияларни бекор қилишни сўради

Венгрия Евроиттифоққа мурожаат қилиб, санкция рўйхатларидан россиялик уч нафар тадбиркор — USM Holdings асосчиси Алишер Усмонов, «Алфа-групп» эгаларидан бири Пётр Авен ва Магнитогорск металлургия комбинати эгаси Виктор Рашниковни чиқариб ташлашни сўраган, деб ёзади Meduza. Бу ҳақда Politico европалик дипломатларга таяниб хабар берган.

Журналистлар суҳбатдошларига кўра, бунинг эвазига Будапешт уруш бошланганидан кейин Евроиттифоқ томонидан Россияга қарши киритилган санкциялар узайтирилишига қарши чиқмасликка ваъда берган.

Шунингдек, Венгрия гуманитар ташкилотларга санкциялар таъсирига учраган Россия банкларининг баъзилари билан алоқани сақлаш имкониятини тақдим этишни талаб қилмоқда.

Дипломатик манбалар даъво қилишича, Будапештнинг позицияси баъзи Евроиттифоқ мамлакатларида «ғазабни келтириб чиқарган». Бундан ташқари, европалик мансабдорлар Венгрия шу тариқа Россияга қарши санкцияларни айланиб ўтиш учун «туйнуклар» яратишга уринаётганидан хавфсирамоқда.

Санкция қонунчилигига мувофиқ, Евроиттифоқ Россияга қарши февраль охирида киритилган санкцияларнинг амал қилиш муддатини 15 сентябргача узайтириши керак. Венгрия ўз позициясини билдиргунига қадар санкцияларнинг узайтирилиши расмий жараён сифатида кўрилаётган эди. Энди эса Будапештнинг илтимоси 7 сентябрь куни Евроиттифоқ вакиллари мажлисида алоҳида муҳокама қилиниши керак.

USM Holdings асосчиси, миллиардер Алишер Усмонов 28 февраль куни, Украинада Россия операцияси бошланганидан кейин тўрт кун ўтиб, Евроиттифоқ санкцияларига учраган эди. Бизнесмен Брюсселнинг бу қароридан норози бўлиб, май бошида Европа умумий юрисдиксия судига апелляция берди. У суддан апелляция бўйича якуний қарор қабул қилингунига қадар санкциялар амал қилишини тўхтатиб қўйишни сўради. Усмоновга қарши АҚШ, Канада, Буюк Британия ва Япония ҳам санкциялар киритган.

Май ойининг иккинчи ярмида Усмонов The Times газетаси талқини бўйича Буюк Британиянинг энг бадавлат одамлари ўнлигидан чиқиб кетди.