Самарқандда ҳокимликдан тадбиркор фойдасига салкам бир миллиард сўм компенсация ундириладиган бўлди
Самарқанд вилояти Адлия бошқармаси аралашуви билан Самарқанд шаҳар ҳокимлиги тадбиркорнинг бузилган савдо дўкони учун 925 миллион 181 минг 352 сўм компенсация тўлаб берадиган бўлди. Бу ҳақда «Дарё» вилоят адлия бошқармаси Жамоатчилик билан алоқалар бўлими маълум қилди.
Хабар берилишича, тадбиркорга Самарқанд шаҳар ҳокимининг 2011 йил 14 февралдаги қарори билан Регистон майдонига туташ ҳудудда жойлашган қурилиш ости майдонидан 161 кв/метрдан иборат савдо дўкони биносини фойдаланишга қабул қилиш далолатномаси тасдиқланган ҳамда ушбу бинолар тадбиркорга хусусий мулк қилиб берилиб, доимий фойдаланиш ҳуқуқи билан бириктирилган.
Бироқ, орадан олти йил ўтгач, Самарқанд шаҳар ҳокимининг 2017 йил 17 апрелдаги «Йўлбарслар хиёбони ҳудудида жойлашган жисмоний ва юридик шахсларга тегишли бўлган савдо дўкони биноларини бузиш тўғрисида»ги қарори билан тадбиркорга тегишли 160,47 кв/метр савдо дўкони бузилган. Ҳокимликнинг 2017 йил 28 апрелдаги «Бузилишга тушган маиший савдо дўкон бинолари учун товон тариқасида ер майдони ажратиш ва қурилишга рухсат бериш тўғрисида»ги қарори билан тадбиркорнинг бузилишга тушган савдо дўкони ўрнига мутаносиб равишда ер майдони ажратиб бериш назарда тутилган. Самарқанд шаҳар архитектура ва қурилиш бўлимига ер танлаш далолатномасини расмийлаштириш ва ер майдонини натурада ўлчаб бериш вазифаси юклатилган. Аммо давлат кадастрлари палатаси вилоят бошқармасининг 2021 йил 3 ноябрдаги хатида фуқаро З.Содиқовнинг бузилган савдо дўкони ўрнига ажратилган ер майдони тўғрисида маълумот мавжуд эмаслиги маълум қилинган.
Шунингдек, «Афросиёб баҳо» МЧЖ томонидан 2017 йил 29 март куни тадбиркорнинг бузилган савдо дўкони 493 миллион 805 минг сўмга баҳоланган. Бундан ташқари, Марказий банк Самарқанд вилоят бош бошқармасининг 2021 йил 17 ноябрдаги маълумотида Ўзбекистон Республикасида инфляция кўрсаткичи ҳисоблаб чиқилиб, бузилган савдо дўкони инфляция кўрсаткичи билан умумий қиймати 925 миллион 181 минг 352 сўмни ташкил этиши баён қилинган.
Тегишли қонун ҳужжатлари талабларидан келиб чиқиб, даъвогар З.Содиқовнинг ер участкаси давлат эҳтиёжи учун олиб қўйилиб, ундаги қурилишлар бузилиши муносабати билан шаҳар ҳокимлиги даъвогарга етказилган ҳар қандай зарарни тўлиқ қоплаб бериши лозим бўлган.
Суд мазкур иш юзасидан тўпланган ҳужжатларни ўрганиб чиқиб, Самарқанд шаҳар ҳокимининг 2017 йил 28 апрелдаги қарорига асосан тадбиркорга товон тариқасида ажратилган 160,47 кв/метр ер майдони ўрнига Самарқанд шаҳар ҳокимлигидан жами 925 миллион 181 минг 352 сўм компенсация ва 1 миллион 200 минг сўм давлат божи ундириш тўғрисида қарор қабул қилди.
