ЯИДХПда автомобиллар билан боғлиқ хизматларда узилишлар юзага келди

Ягона интерактив давлат хизматлари портали (my.gov.uz)да автомобиллар билан боғлиқ хизматлар ишида узилишлар юзага келмоқда. Бу ҳақда портал ахборот хизмати хабар қилди.

Қайд этилишича, Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Автомототранспорт ҳисоби» ва «Ҳайдовчилик гувоҳномаси» ахборот тизимлари янги «Ягона автоматлаштирилган ахборот тизими»га ўтмоқда.

Шу муносабат билан my.gov.uz орқали автомототранспорт воситалари билан боғлиқ (Эски намунадаги миллий ҳайдовчилик гувоҳномаларини янгисига алмаштириш, Автотранспорт ойналарининг тусини ўзгартиришга рухсатнома олиш, Автотранспорт бошқаруви учун жисмоний шахсларга электрон ишончнома бериш) хизматларда узилишлар юзага келмоқда.

Юзага келаётган муаммоларни бартараф этиш бўйича Ички ишлар вазирлиги мутахассислари томонидан зарур чора-тадбирлар амалга оширилмоқда.

«Муаммо бартараф этилиши билан қўшимча ахборот берилади», — дейилади хабарда.